“सून म्हणून माझा स्वीकार…”, राकेश बापटबद्दल राखी सावंतचे वक्तव्य; म्हणाली, “त्याचं माझ्यावर प्रेम…”

राखी सावंत वाईल्डकार्ड म्हणून बिग बॉस मराठीच्या सहाव्या पर्वात आली होती. बिग बॉसमध्ये आल्यानंतर तिने तिच्या खेळाने प्रेक्षकांची मने जिंकली. काही वेळा तिच्या वक्तव्यांमुळे तिच्यावर प्रेक्षकांनी टीकाही केली. तिने चित्र विचित्र अवतार करत प्रेक्षकांसह घरातील सदस्यांचे मनोरंजन केले.

याबरोबरच तिने वेळोवेळी राकेश बापटवर प्रेम असल्याचे सांगितले. राकेशसाठी तिने इतर सदस्यांबरोबर भांडणे केली. राकेशबद्दल माझ्या मनात भावना आहेत, असे तिने वेळोवेळी सांगितले. राकेशने त्याच्याकडून फक्त मैत्री आहे, प्रेम आहे असे सांगितले तेव्हा राखीला वाईटही वाटले. ती रडली, भावूकही झाल्याचे पाहायला मिळाले.

“मला तो खूप…”

आता राखी सावंत नुकतीच बिग बॉसच्या घरातून एलिमिनेट झाली असल्याचे पाहायला मिळत आहे. त्यानंतर तिने माध्यमांशी बोलताना राकेश बापटवर प्रेम असल्याचे सांगितले. आता लोकमत फिल्मीशी राखी सावंतने संवाद साधला. त्यावेळी तिला विचारण्यात आले की, भविष्यात राकेशबरोबर लग्न करणार का? यावर राखी म्हणाली, “मला त्याच्यावर प्रेम झालं आहे, माझं एकतर्फी प्रेम आहे, त्याचं माझ्यावर प्रेम नाही, तो खूपच छान आहे, मला तो खूप आवडतो; बिग बॉसच्या घरात असताना मी त्याची खूप काळजी घेतली आहे, त्यानेसुद्धा माझी काळजी घेतली आहे.”

फॅमिली वीकमध्ये राकेशची आई आणि बहीण घरात आल्या होत्या. त्याचा उल्लेख करत राखी म्हणाली, “मला त्याची बहीण आणि आई खूप आवडल्या. त्यांचं कुटुंब खूप छान आहे. मला वाटत नाही की ते माझा सून म्हणून स्वीकार करतील. ते मला आपलेसे करतील असं वाटत नाही, कारण मी बॉलीवूडची क्वीन आहे. मला वाटतं की त्यांना सेलिब्रिटी नसलेली मुलगी हवी असेल. पण, हे माझं नशीब राकेश बापटबरोबर लिहिलं असेल तर त्याला कोणीही काही करू शकत नाही”, असे म्हणत राखीने तिचे मत व्यक्त केले.

बिग बॉस मराठीचे सहावे पर्व आता अंतिम टप्प्यात आहे. नुकताच या पर्वातील शेवटचा भाऊचा धक्का पार पडला. तिकीट टू फिनाले तन्वी कोलतेने जिंकले. तन्वीबरोबरच अनुश्री माने, राकेश बापट, दीपाली सय्यद, विशाल कोटियन, रेवा कौरसे हे स्पर्धक आहेत. आता यांपैकी कोणता स्पर्धक ट्रॉफीवर त्याचे नाव कोरणार हे पाहणे महत्त्वाचे ठरणार आहे.