“दारू प्यायचो, लोकांशी उद्धट बोलायचो, मी राक्षस झालो होतो”; अभिनेत्याने स्वतः वाचला आपल्या चुकांचा पाढा, म्हणाला, “मी मेलो असतो”

राम कपूर म्हणाला, “मी २७ वर्षे काम केलंय. अनेक सिनेमे आणि इतर कामं केली असली तरी माझी खरी ओळख एकाच मालिकेमुळे आहे – ती म्हणजे ‘बडे अच्छे लगते हैं’. मी जगापासून एक सिक्रेट लपवून ठेवलं होतं, जे माझ्या पत्नीलाही माहीत नाही. या मालिकेदरम्यान मी माझ्या आयुष्यातील सर्वात भयानक नैराश्यातून जात होतो. माझ्या वजनामुळे मला लोकांचे खूप प्रेम मिळालं आणि काही काळ मी टीव्हीचा सर्वात लोकप्रिय स्टार बनलो होतो.”

पुढे रामने सांगितलं, “माझं वजन दिवसेंदिवस वाढतच गेलं. डॉक्टरांनी मला सांगितलं होते की माझं आरोग्य खूपच बिघडलंय आणि ६ महिन्यांत माझा मृत्यूही होऊ शकतो. मला दिवसातून तीन वेळा इन्सुलिन घ्यावे लागत होते. माझी शुगर ४०० ते ६०० च्या दरम्यान होती आणि मी दिवसातून १४ तास काम करत होतो. तरीही मला माझ्या दिनचर्येत बदल करायचा नव्हता, कारण मला प्रचंड प्रेम आणि पैसा मिळत होता. हे सर्व सोडून मी कसा जाऊ शकत होतो? पण या काळात मी एक वाईट माणूस बनलो होतो.”

शूटिंगसाठी ६ तास उशीर आणि सेटवरच दारू प्यायचा राम कपूर

प्रकृती खालावल्यामुळे तो विचित्र वागू लागला आणि त्याचा परिणाम कामावर झाला. “मी शूटिंगसाठी तब्बल ६ तास उशिरा जायचो, सेटवर दारू प्यायचो आणि लोकांशी खूप उद्धटपणे बोलायचो. मी अगदी राक्षस बनलो होतो. शेवटी ती मालिका माझ्यामुळेच बंद झाली. मी त्यावेळी असा माणूस बनलो होतो ज्याची मला आज स्वतःलाच लाज वाटते,” अशी कबुली राम कपूरने दिली.

स्पर्धक हर्षद चोप्राने आत्महत्येच्या प्रयत्नाबद्दल सांगितलं होतं. त्याचा उल्लेख करत राम म्हणाला, “मला मुलं नसती, तर हर्षदने जे केलं तेच मीसुद्धा केलं असतं. मुलं असल्यावर तुम्ही त्यांच्यासाठी जगता आणि स्वतःचं आयुष्य संपवण्याचा अधिकार तुम्हाला नसतो. याच एका गोष्टीने मला वाचवले, आज मी जिवंत आहे ते फक्त याच कारणामुळे. आता १० वर्षांहून अधिक काळ लोटला आहे आणि आज मी एक माणूस म्हणून खूप आनंदी आहे. गौतमी आणि माझ्या मुलांनाही याबद्दल आताच समजणार आहे.”

राम कपूरचे इतर दोन सिक्रेट म्हणजे लहानपणी त्याचं लैंगिक शोषण झालं होतं. तर, त्याच्या वडिलांना कॅन्सरचे उपचार घ्यायचे नव्हते, त्यासाठी त्यांची मदत केल्याचं रामने सांगितलं होतं. हे त्याचं दुसरं सिक्रेट होतं. आता त्याने त्याचं तिसरं सिक्रेट सांगितलं आणि तो लॉक अपच्या फिनालेमध्ये पोहोचला आहे. या शोच्या विजेत्याची घोषणा ५ ऑगस्ट रोजी होईल.