Siddharth Chandekar : सिद्धार्थ चांदेकरने काही दिवसांपूर्वीच ‘मी होणार सुपरस्टार-छोटे उस्ताद ३’ या ‘स्टार प्रवाह’वरील कार्यक्रमाच्या सूत्रसंचालनाची जबाबदारी स्वीकारली. शोमध्ये अभिनेता नेहमीच सर्वांचं मनोरंजन करत असतो, अनेकदा लहानग्या स्पर्धकांना आणि परीक्षकांना सिद्धार्थ सरप्राइज देत असतो. मात्र, आता दिवाळीच्या सणानिमित्त खास आदर्श शिंदेने सिद्धार्थला एक गोड Surprise दिलं आहे.
‘मी होणार सुपरस्टार-छोटे उस्ताद ३’ या शोच्या रंगमंचावर सिद्धार्थ चांदेकरचे कुटुंबीय त्याला भेटण्यासाठी येणार आहेत. अभिनेत्याची पत्नी मिताली मयेकर, त्याची आई सीमा चांदेकर आणि त्याचे सावत्र वडील नितीन म्हसवडे असे सगळे सहकुटुंब या कार्यक्रमात उपस्थित राहिल्याचं नव्या प्रोमोमध्ये पाहायला मिळत आहे.
हेही वाचा : प्रार्थना बेहेरे इथेच राहतात का? अलिबागच्या नव्या घरात पोहोचले पूजा सावंतसह सगळे मित्रमंडळी, व्हिडीओ आला समोर
सिद्धार्थ चांदेकरच्या ( Siddharth Chandekar ) आईने गेल्यावर्षी दुसरं लग्न केलं. अभिनेत्याने बायको मितालीच्या साथीने आईचं दुसरं लग्न लावण्यासाठी पुढाकार घेतला होता. याचे फोटो सोशल मीडियावर देखील बरेच व्हायरल झाले होते. यानंतर हे कुटुंबीय पहिल्यांदाच नॅशनल टेलिव्हिजनवर एकत्र आले आहेत.
सर्वप्रथम सिद्धार्थ चांदेकरची पत्नी मिताली मयेकर रंगमंचावर येते. हे दोघंही एकमेकांना मिठी मारतात. यानंतर मागून आई आल्याचं पाहताच सिद्धार्थ एकदम भारावून जातो. सोबतीला त्याचे सावत्र वडील नितीन म्हसवडे सुद्धा त्याला सरप्राइज देण्यासाठी आलेले असतात. सिद्धार्थ आमच्या कुटुंबाचे नवे सदस्य असं सांगत सर्वांना त्यांची ओळख करून देतो. तसेच हे दोघंही एकमेकांना खूप चांगली साथ देतात असंही सिद्धार्थ यावेळी म्हणाला.
सिद्धार्थचे ( Siddharth Chandekar ) सावत्र वडील नितीन यावेळी म्हणाले, “आयुष्याच्या व्याकरणातील सगळे नियम आता मोडलेत आणि आता आम्ही सगळेजण एकमेकांसाठी सर्वस्व आहोत” असं त्यांनी सांगितलं. पुढे, सिद्धार्थच्या आईने दिवाळीनिमित्त लाडक्या लेकाचं औक्षण देखील केलं.
दरम्यान, सिद्धार्थच्या ( Siddharth Chandekar ) चेहऱ्यावरचा आनंद पाहून सगळे प्रेक्षक व शोचे परीक्षक देखील आनंदी झाल्याचं या व्हिडीओमध्ये पाहायला मिळत आहे. याशिवाय अभिनेत्याच्या कामाबद्दल सांगायचं झालं, तर काही दिवसांपूर्वीच सिद्धार्थ ‘झिम्मा २’, ‘ओले आले’, ‘श्रीदेवी प्रसन्न’ अशा चित्रपटांमध्ये झळकला होता. आता येत्या काही काळात अभिनेता आणखी कोणत्या प्रोजेक्ट्समध्ये झळकणार याची त्याचे चाहते आतुरतेने वाट पाहत आहेत.
