Pallak Yadav and Nikhil Malik Breakup : आपल्या देशात रिअॅलिटी शोची खूप क्रेझ आहे. बरेच लोक अभिनय क्षेत्रात येण्यासाठी रिअॅलिटी शोपासून सुरुवात करतात. या शोमध्ये काही स्पर्धक एकत्र येतात, एकमेकांच्या प्रेमातही पडतात. यापैकी काही नाती टिकतात, तर काही नाती मात्र फार काळ टिकत नाहीत. कालांतराने विविध कारणं देतात जोडपी ब्रेकअप करतात. आता अशाच एका रिअॅलिटी शोमधील स्पर्धकांनी ब्रेकअपची घोषणा केली आहे.
स्प्लिट्सव्हिला हा टीव्हीवरील सर्वात लोकप्रिय डेटिंग रिॲलिटी शोपैकी एक आहे. या शोचा १३ वा सीझन खूप गाजला होता. मराठमोळा अभिनेता जय दुधाणे आणि अदिती राजपूत या पर्वाचे विजेते ठरले होते. पण या शोमध्ये आणखी एक जोडी खूप लोकप्रिय ठरली होती, ती म्हणजे पलक यादव आणि निखिल मलिक होय. आता निखिल व पलक यांनी वेगळं होण्याचा निर्णय घेतला आहे.
सोशल मीडियावर पोस्ट करून दिली माहिती
निखिल आणि पलक या दोघांनीही इन्स्टाग्राम स्टोरीजवर त्यांच्या ब्रेकअपची घोषणा केली. यापुढे एकत्र नसू, पण दोघांना एकमेकांबद्दल प्रेम आणि आदर आहे, असं त्यात लिहिलंय. “जड अंत:करणाने पलक आणि मी वेगळे होण्याचा निर्णय घेतला आहे. यापुढे आम्ही रिलेशनशिपमध्ये नसू मात्र आम्हाला एकमेकांबद्दल आदर आहे. आम्ही स्वतःवर आणि आमच्या करिअरवर लक्ष केंद्रित करण्यासाठी काम करू,” असं निखिलने लिहिलं.
हेही वाचा – ‘तारक मेहता…’ फेम अभिनेत्रीने नाकारली बिग बॉस १८ची ६५ कोटी रुपयांची ऑफर, कोण आहे ती?
पलक यादवने तिच्या इन्स्टाग्राम स्टोरीवर एक पोस्ट केली. “आम्ही बेस्ट फ्रेंड म्हणून आमच्या नात्याची सुरुवात केली होती आणि यापुढेही आम्ही एकमेकांचे बेस्ट फ्रेंड राहू. मला आशा आहे की तुम्ही समजून घ्याल आणि आमच्यावर प्रेम करत राहाल. पलक आणि निखिल,” असं तिने लिहिलं.
हेही वाचा – Video: ग्रँड फिनालेआधी बिग बॉसमध्ये मोठा ट्विस्ट; घोषणा ऐकताच स्पर्धकांना बसला धक्का, नेमकं काय घडलं?
निखील व पलक स्प्लिट्सव्हिला १३ मध्ये भेटले होते. २०२१ मध्ये हा सीझन आला होता. ते दोघे या शोमध्ये पहिल्याच दिवशी कनेक्ट झाले होते, पण आता तीन वर्षांनी त्यांनी वेगळे होण्याचा निर्णय घेतला आहे.
