“फॅन्सला इज्जत देतो; पण ते डोक्यावर बसतात…”, सूरज चव्हाणच्या घरी घडलं असं काही की बायको चिडली अन्…

‘हॉट सीट टॉक्स’ या यूट्यूब चॅनेलला दिलेल्या मुलाखतीत सूरजने सोशल मीडियावरील सुरुवातीच्या दिवसांची आठवण सांगितली. तो म्हणाला, “दुसऱ्यांचे व्हिडीओ पाहून मी ते कसे बनवतात, हे शिकलो. वाळू भरणं आणि शेणखताची कामं करून कष्टाच्या पैशातून पहिला मोबाईल घेतला. त्यानंतर दिवसाला ३० ते ३५ व्हिडीओ तयार करीत होतो. सुरुवातीला लोक माझी खिल्ली उडवत, ‘हा वेडा आहे’, अशा कमेंट्स करीत होते. मात्र, मी त्याकडे कधीच लक्ष दिले नाही.”

…म्हणूनच ते माझ्यावर प्रेम करतात – सूरज

चाहत्यांबद्दल बोलताना सूरज म्हणाला, “आज मी जे काही आहे, ते फक्त माझ्या फॅन्समुळे आहे. फॅन्स माझ्यासाठी देव आहेत. त्यांनी मला भरभरून प्रेम दिलं. त्यामुळेच संपूर्ण महाराष्ट्र माझे डायलॉग बोलतो. लोक मला त्यांच्या घरातील एक असल्यासारखं मानतात. मी जसा आहे तसाच लोकांसमोर राहतो आणि म्हणूनच ते माझ्यावर प्रेम करतात. मी खरं बोलतो म्हणून लोकांना मी आवडतो.”

या लोकप्रियतेबरोबर आलेला एक कटू अनुभवही सूरजने सांगितला आहे. तो म्हणाला, “मी फॅन्सना खूप मान देतो; पण त्यांनीही मला समजून घेतलं पाहिजे. एकदा काही मुलं माझ्या घरी माझ्या घरी नशा करून आले होते. त्यांनी गुटखा खाऊन बाथरूममध्ये उलटी केली. त्यामुळे माझी बायको चिडली आणि तुमचे फॅन्स बाहेर ठेवायचे, असं तिनं सांगितलं.”

पुढे तो म्हणाला, “मी फॅन्सला इज्जत देतो ना, तर ते डोक्यावर बसतात. फॅन्सनी माझ्यावर डोक्यावर नाही, तर मनात बसावं. फॅन्सनी माझ्या मनावर राज्य केलं आहे आणि मी त्यांना माझ्या हृदयात ठेवतो; पण त्यांनी एवढं पण अती करू नये. पुढे सूरज म्हणाला की, मी फॅन्सला नेहमी महत्त्व देतो. बिग बॉस जिंकून आल्यानंतर मी रात्रभर लोकांना फोटो देत होतो. थोड्या वेळ झोपलो आणि पुन्हा सर्वांना भेटलो. जवळपास १० दिवस मी फक्त आणि फक्त फॅन्सना भेटत होतो.”