‘तो’ नराधम कोण? ‘तारिणी’मध्ये अनपेक्षित ट्विस्ट, समोर आला वेगळाच खलनायक! दयानंद खांडेकरांचं भलतंच रूप, प्रेक्षक झाले शॉक

लग्नसोहळा पार पडल्यावर तारिणी आणि केदार दोघंही ‘JPC मेडिकल स्कॅम’ नेमका कोणामुळे झाला होता, तारिणीच्या आईवर आत्महत्या करण्याची वेळ कोणामुळे आली होती याचा शोध घेणार आहेत. या दोघांनी खांडेकरांच्या घरात बरीच शोधाशोध केलेली असते. यादरम्यान केदारच्या हातात एक महत्त्वाचा पुरावा सापडतो. केदारची आई हयात नसते, तिचे काही जुने रिपोर्ट्स त्याला सापडतात. केदारची आई भेसळयुक्त घेत असल्याचं त्याच्यासमोर स्पष्ट झालं आहे.

केदार रिपोर्ट्स पाहत तारिणीला म्हणतो, “बॉस माझी आई त्याच गोळ्या घ्यायची, ज्या गोळ्यांमध्ये भेसळ करून JPC मेडिकल फॅक्टरीने स्कॅम केला.” यावर तारिणी त्याला म्हणते, “म्हणजे माझ्या आईचा आणि तुझ्या आईचा गुन्हेगार एकच आहे. कोण आहे ती व्यक्ती?”

खरंतर, खांडेकरांच्या घरात तारिणीला सगळ्यात मोठा संशय युवराजवर असतो. युवराजचे गुंडांशी असलेले संबंध, त्याची ड्रग्ज पुरवठा करणाऱ्या गुलाबशी असलेली मैत्री या गोष्टी कायम तारिणी-केदारला खटकत असतात. पण, मेडिकल स्कॅममध्ये युवराज सोडून एक वेगळाच गुन्हेगार प्रेक्षकांसमोर येणार आहे.

या सगळ्यामागचा खरा सूत्रधार आहे दयानंद खांडेकर! हा अनपेक्षित ट्विस्ट पाहून प्रेक्षकही शॉक झाले आहे. जे दयानंद खांडेकर इतके दिवस आपल्या मुलाच्या विरहात रडत होते, तेच खांडेकर या सगळ्याच्या मूळाशी असतात. समोर आलेल्या प्रोमोमध्ये दयानंद खांडेकर कोणत्याही काठीच्या सपोर्टशिवाय अगदी व्यवस्थित वावरताना दिसत आहेत. याचा अर्थ हेल्थ इश्यू हे सुद्धा एक नाटक आहे. यानंतर स्टोअर रूममध्ये शोधाशोध केल्यावर त्यांना JPC मेडिकल स्कॅमच्या कॅसेट्स कुठेच सापडत नाहीत…आणि यामुळेच त्यांना संशय येतो. “JPC मेडिकल स्कॅमच्या कॅसेट्स गेल्या कुठे? कोणी काढल्या असतील?” असा विचार ते करतात.

आता तारिणी आणि केदार दयानंद खांडेकरांपर्यंत पोहोचू शकतील का? हे पाहणं महत्त्वाचं ठरणार आहे. ३० आणि ३१ मार्चला हा एपिसोड ऑन एअर केला जाईल.

दरम्यान, प्रेक्षक हा प्रोमो पाहून शॉक झाले आहेत. “अरे देवा अनपेक्षित ट्विस्ट”, “दयानंद खांडेकर…काय वळण घेतलंय मालिकेने”, “जबदस्त ट्विस्ट”, “सुरुवातीला तरी असेच येणार समोर… आणि नंतर कदाचित खरा सूत्रधार असेल दयानंदचा गायब असलेला भाऊ”, “डेंजर आहे हे” अशा प्रतिक्रिया या प्रोमोवर आल्या आहेत.