“युद्धामुळे आम्ही…”, इस्त्रायलमध्ये पाहिली जातेय ‘ठरलं तर मग’ मालिका! जुई म्हणाली, “युनिट अक्षरश: रात्रंदिवस…”

हे कुटुंबीय इस्त्रायलमध्ये राहतात. दररोज न चुकता हे कुटुंबीय ‘ठरलं तर मग’ मालिका पाहतात. या मालिकेतील मुख्य जोडी तसेच प्रिया सुद्धा आम्हाला खूप आवडते असं मत या कुटुंबीयांनी व्यक्त केलं आहे. हा खास व्हिडीओ जुईने इन्स्टाग्रामवर शेअर करत या कुटुंबीयांसह सर्व प्रेक्षकांचे आभार मानले आहेत.

हे कुटुंबीय सांगतात, “आम्ही इस्त्रायलमध्ये स्थायिक आहोत. सध्या इथे काय परिस्थिती आहे हे तुम्हाला सर्वांना माहितीच आहे. या युद्धामुळे आम्ही मानसिक तणावात असतो. पण, ‘ठरलं तर मग’ मालिका पाहून छान वाटतं. आम्ही सर्व कुटुंबीय एकत्र मिळून ही मालिका पाहतो. आम्ही कोणताच भाग पाहणं चुकवत नाही, कारण ही मालिका आम्हाला फार आवडते. या मालिकेतील मुख्य जोडी सायली-अर्जुनचा अभिनय आम्हाला खूप आवडतो. याचबरोबर प्रिया सुद्धा फार सुंदर अभिनय करते. तिची भूमिका सुद्धा आम्हाला आवडते. आम्हा सर्वांकडून टीमला खूप-खूप शुभेच्छा!”

ध्येय एकच… एपिसोड थांबता कामा नये!

इस्त्रायलमध्ये राहणाऱ्या कुटुंबाचा व्हिडीओ शेअर करत जुईने सुद्धा खास पोस्ट लिहिली आहे. जुई लिहिते, “गेले काही दिवस ‘ठरलं तर मग’ मालिकेचे ४५ मिनिटांचे एपिसोड रोज सुरु आहेत. हे ऐकायला जरी “हो मग त्यात काय?” असं वाटलं तरी, ते रोज करणं खूपच अवघड आहे. रोजचा (सोम ते रवि) २२ मिनिटांचा भाग असला तरी पूर्ण युनिट अक्षरशः दिवस-रात्र काम करत असतं. कलाकार घरी गेले तरी पोस्टप्रॅाडक्शनची मंडळी, एडिटर्स हे Round o clock शिफ्ट्समध्ये काम करतात. मग रोज ४५ मिनिटांचा एपिसोड करणं अजिबात सोपं नाही! पूर्ण युनिट यासाठी अथक परिश्रम करतं…”

“कधी चिडचिड होते..कधी रडारड.. फक्त कलाकारांची नाहीतर डिरेक्शन, लाईटमन, स्पॉट, सेटींग, साऊंड, कॅमेरामन, हेअर मेकअप कॉस्ट्युम या सगळ्यांची डबल युनिट मध्ये तारांबळ उडते! काहीही झालं तरी ध्येय एकच… एपिसोड थांबता कामा नये… आणि अशातच जगाच्या वेगवेगळ्या भागात सुरु असलेल्या युध्द परिस्थितीत अडकलेल्या, मराठी भाषिकही नसलेल्या इस्त्रायलच्या प्रेक्षकांकडून कौतुकाची थाप मिळते तेव्हा वाटतं “Its all worth it” आपण आपल्या मालिकेच्या माध्यामातून अशा परिस्थितीत अडकलेल्या एका कुटुंबाला आनंद देऊ शकलो याचा मला खूप जास्त आनंद आहे.. देव करो आणि ते सगळे कायम सुखरुप राहोत.” अशा भावना जुई गडकरीने व्यक्त केल्या आहेत.