Video: “जय भवानी…”, अन्यायाविरुद्ध लढणार कमळी; मालिकेत नेमकं काय घडणार? पाहा प्रोमो

झी मराठी वाहिनीवर प्रदर्शित होणाऱ्या कमळी मालिकेचा मोठा चाहतावर्ग आहे. कमळी एका छोट्या गावातून मुंबईत आली आहे. तिला तिची स्वप्ने पूर्ण करायची आहेत. तिला शिक्षण घेऊन गावातील मुलींसाठी काहीतरी करायचे आहे. त्यासाठी ती तिच्या मैत्रिणीसह निंगीसह मुंबईत आली आहे. मुंबईत आल्यानंतर मात्र तिला अनेक संकटांना सामोरे जावे लागते.

अनिका तिला कॉलेजमधून बाहेर काढण्यासाठी अनेक प्रयत्न करते. इतकेच नाही तर यासाठी ती तिच्या मित्र-मैत्रिणींची आणि तिच्या आई-आजीची मदत घेते. अनिकाची आजी आणि आईदेखील तिला तिच्या कट कारस्थानात वेळेवेळी मदत करतात. कमळीला संकटात टाकण्यासाठी, तिच्याविरुद्ध कारस्थान करण्यासाठी अनिका सतत प्रयत्न करताना दिसते.

अन्नपूर्णा आजी आणि राजन गेल्या अनेक वर्षांपासून त्यांच्या मोठ्या नातीच्या शोधात होते. मोठी सून आणि नात कधी ना कधी भेटेल अशी आजीला खात्री होती. तसे प्रयत्नही सुरू होते. मात्र, त्यांची भेट होऊ नये यासाठी कामिनी कारस्थान करत राहिली. कामिनीने कारस्थान करत सरोजचा अपघात घडवून आणला. तसेच, तिच्याबरोबरच एका मुलीलाही त्या कारमध्ये ठेवले, ज्यामध्ये त्या मुलीचा मृत्यू झाला. त्यानंतर नातीच्या मृत्यूची बातमी ऐकून आजीला धक्का बसला, ती आजारी पडली.

आजारी पडल्यानंतर राजनने तिला बरे वाटावे म्हणून एक निर्णय घेतला. जिचे निधन झाले ती आजीची खरी नात नव्हती, तर कमळी खरी नात आहे असे सांगितले. कमळीसुद्धा आजीच्या प्रकृतीसाठी हे नाटक करायला तयार झाली. तिने अनेकदा आजीला खरे सांगण्याचा प्रयत्न केला, मात्र ती सांगू शकली नाही.

कमळी मालिकेत नेमकं काय घडणार?

आता कमळी मालिकेचा एक प्रोमो प्रेक्षकांच्या भेटीला आला आहे. यामध्ये पाहायला मिळते की अनिका कमळीला म्हणते, तू खोटारडी आहेस. राजन तिला म्हणतो, “कमळे, आईसाठी यांना मान्य करावं लागेल.” अनिकाची आई म्हणते, “तुझी विकेट आता लगेच निघणार.” ऋषीकेश म्हणतो, “तू खोटारडी नाहीस, काहीही झालं तरी कमळी चुकणार नाही.” आजी म्हणते, “बोल ना कमळी, माझीच नात आहेस ना तू?”, त्यानंतर सगळेजण एकत्र म्हणतात की तू बोलत का नाहीस? तू गप्प का आहेस? हे सगळे प्रश्न ऐकून कमळीला त्रास होतो. तिच्या डोक्यात हे विचार चालू आहेत असे दिसते. शेवटी तिची आई गौरी तिला म्हणते, “कमळे संकटाला पाठ दाखवू नकोस, ही लढाई खऱ्या-खोट्याची नाही. अन्यायाविरुद्ध न्यायाची आहे. मावळा होऊन लढ, कमळे.” त्यानंतर कमळी छत्रपती शिवाजी महाराजांच्या मूर्तीसमोर जाते आणि जय भवानी असा जयघोष करते.

हा प्रोमो शेअर करताना झी मराठी वाहिनीने, “अन्यायाविरुद्ध न्यायाची लढाई लढायला सज्ज झाली कमळी”, अशी कॅप्शन दिली आहे.

दरम्यान, आता मालिकेत काय घडणार हे पाहण्यासाठी प्रेक्षक उत्सुक आहेत.