ठकुबाई आल्या हो, उषा नाडकर्णींची नवीन मालिका ‘येतेच आता मी नांदायला’! प्रोमोवर अविनाश नारकरांची खास कमेंट, म्हणाले, “ताई…”

झी मराठीवर लवकरच ‘येतेच आता मी नांदायला’ ही नवीन मालिका प्रेक्षकांच्या भेटीला येत आहे. या मालिकेत ज्येष्ठ अभिनेत्री उषा नाडकर्णी महत्त्वपूर्ण भूमिका साकारणार आहेत. त्यांच्या भूमिकेचं नाव आहे ठकुबाई! ‘येतेच आता मी नांदायला’मधून प्रेक्षकांना ‘ठकुबाईचा ठसका’ ‘अनुभवायला मिळणार आहे.

“भलेभले घेतात जिचा धसका, आता दुनिया पाहणार त्या ‘ठकुबाईचा ठसका!” असं कॅप्शन वाहिनीने या प्रोमोला दिलं आहे. या ठकुबाईचा धाक इतका असतो की, ती कायमची सोडून गेलीये ही बातमी ऐकताच गावकरी आनंदी होतात. पण, अचानक तिला शुद्धा येते. “ठकु म्हातारी मेली नाहीये…ती परत आलीये” हे ऐकून गावकरी प्रचंड घाबरतात. तिचा फोटो हटवला जातो, तिला श्रद्धांजली देणारे बॅनर गुंडाळले जातात, बँडवाले पळून जातात…आणि शेवटी ठकुबाई म्हणते, “बघितला ना ठकुबाईचा ठसका…मला भेटायला तयार राहा!”

या प्रोमोवर नेटकऱ्यांनी कौतुकाचा वर्षाव केला आहे. अविनाश नारकरांनी यावर, “वाह-वाह-वाह उषाताई…कमाल…कमाल…कमाल!” तर, मेघा धाडेने यावर कमेंट करत “वाह कमाल आऊ” असं म्हटलं आहे. याशिवाय अभिज्ञा भावे, श्रेया बुगडे, किरण गायकवाड या कलाकारांनीही कमेंट्स करत या नव्या मालिकेच्या प्रोमोचं आणि उषा नाडकर्णींचं कौतुक केलं आहे.

‘येतेच आता मी नांदायला’ ही मालिका लवकरच प्रेक्षकांच्या भेटीला येणार आहे. वाहिनीने अद्याप या मालिकेची लॉन्च डेट जाहीर केलेली नाहीये. आता उषा नाडकर्णी यांच्यासह या मालिकेत कोणकोणते कलाकार झळकणार हे पाहणं महत्त्वाचं ठरणार आहे.