“मला राग येतो…”, नाटक थांबवून प्रेक्षकांवर ओरडण्याबद्दल वंदना गुप्तेंचं स्पष्ट मत, म्हणाल्या, “प्रोफेशनली…”

‘महाराष्ट्र टाइम्स’ला दिलेल्या मुलाखतीमध्ये वंदना गुप्ते यांनी कलाविश्वातील अनुभव सांगितले. यावेळी त्यांनी नाटकाचा प्रयोग सुरू असताना फोन वाजल्यानंतर प्रयोग थांबविण्याबाबत मत व्यक्त केलं. त्या म्हणाल्या, “एकदा तुम्ही नाटक करण्यासाठी मंचावर आलात की, पुढचे तीन तास तुम्ही प्रोफेशनली फक्त नाटकच केलं पाहिजं. नाटकाचा प्रयोग सुरू असताना जर कोणाचा फोन वाजला तरी मी कधीही थांबत नाही. आजकालची मुलं थांबतात आणि दर्शवितात की, फोन वाजला आहे; पण हे नाही केलं पाहिजे.”

तुमचं नाटकाकडे लक्ष नाहीये – वंदना गुप्ते

पुढे त्या म्हणाल्या, “तुम्ही नाटक करताना पूर्णपणे ‘इन्व्हॉल्व्ह’ झालं पाहिजे. तीन तासांच्या प्रोफेशनल नाटकामध्ये तुमची इन्व्हॉल्व्हमेंट झाली नसेल, तर तुमचं नाटकाकडे लक्ष नाहीये. फोनची घंटी वाजण्यासारख्या, इतक्या अशा छोट्या छोट्या गोष्टींमुळे तुमचं लक्ष विचलित होत असेल, तर असं कसं चालेल? आपल्याकडून चूक झाली म्हणून प्रेक्षकांनासुद्धा त्रास होतो; पण ते तुम्ही तिथंच नका ना दाखवून देऊ.”

आम्ही फारच काम करतोय असं दाखवायचं – वंदना गुप्ते

पुढे वंदना गुप्ते म्हणाल्या, “नाटक करताना कोणी असं थांबलं ना की, मला राग येतो; पण मी बोलत नाही. मुलांना याची थोडी जाणीव पाहिजे की, आपण हे तीन तास प्रोफेशनली करतोय. दुर्लक्ष केलं पाहिजे आणि पुढं गेलं पाहिजे. मला असं वाटतं की, त्यांना काहीतरी दाखवायचं असतं की, ‘आम्ही फारच काम करतोय आणि आम्ही फार डिस्टर्ब झालोय.’ पण असं नसतं. तुम्ही जर लक्ष केंद्रित केलं, तर होऊ शकतं. नाटकाबाहेरचा विचार तुमच्या डोक्यामध्ये येता कामा नये.”

वंदना गुप्ते यांनी सांगितला अनुभव

वंदना गुप्ते यांनी त्यांच्या नाटकाच्या प्रयोगाचा अनुभवही सांगितला. त्या म्हणाल्या, “‘चारचौघी’ नाटकामध्ये माझा २० मिनिटांचा मोनोलॉग होता. त्यामुळे ‘प्लीज या २० मिनिटांमध्ये कोणीही आतमध्ये येणार नाही आणि बाहेर येणार नाही,’ अशा सूचना मी आधीच सर्व गेटकीपरला दिलेल्या असायच्या. ते गेटकीपरचं काम आहे आणि ते सर्व जण पाळायचे. कारण- तो पूर्ण एकटीनं बोलायचा संवाद होता; पण जर स्टेजवर एकमेकांशी संवाद सुरू असेल आणि फोन वाजला, तर होऊ दे ना… वाजू दे, प्रत्येक वेळी प्रेक्षकांना आठवण करून देण्याची गरज नसते.”

दरम्यान, वंदना गुप्ते या सध्या ‘कुटुंब किर्रतन’ या नाटकाचे संपूर्ण महाराष्ट्रात प्रयोग करत आहेत.