काँग्रेसने पक्षात महत्वाची जबाबदारी देत राजकारणाच्या आखाड्यात उतरवलेल्या प्रियंका गांधींच्या राजकीय प्रवेशाचे शिवसेनेच्या नेत्या मनिषा कायंदे यांनी कौतुक केले आहे. तसेच त्यांनी प्रियंका गांधींची तुलना माजी पंतप्रधान इंदिरा गांधी यांच्याशी केली आहे. प्रियंका यांच्या सक्रीय राजकारणात येण्याने काँग्रेसला याचा फायदा होईल असेही त्या म्हणाल्या. कायंदे म्हणाल्या, काँग्रेसला प्रियंका गांधी यांच्या चांगल्या व्यक्तीमत्वाचा नक्कीच फायदा होईल. मतदारांवर ते आपली छाप पाडू शकतात. त्यांची हीच प्रतिमा त्यांची आजी इंदिरा गांधी यांच्याशी मिळती जुळती आहे. यापूर्वीही प्रियंका गांधी यांच्यामुळे काँग्रेसला अनेक निवडणुकांमध्ये फायदा झाला आहे. तरुणांमध्ये त्या अधिक लोकप्रिय आहेत.
