मुंबईच्या माहिम परिसरात काल (सोमवार) रात्री ‘अल्ताफ’ या इमारतीचा भाग कोसळला. या दुर्घटनेत ५ जणांचा मृत्यू, तर ६ जण जखमी असल्याचे समजते. कोसळलेल्या इमारतीच्या ढिगाऱ्याखाली अजूनही काही जण अडकल्याची भिती आहे. माहिमच्या छोटा दर्गा परिसरात ही चार मजली इमारत आहे. घटनास्थळी अग्निशमन दलाच्या गाड्या दाखल झाल्या असून मदतकार्य सुरू आहे. जखमींना नजीकच्या रुग्णालयात दाखल करण्यात आले आहे. स्थानिकांनी दिलेल्या माहितीनुसार सदर इमारत जवळपास पन्नास वर्षे जूनी आहे. गेल्या दोन दिवसांपासून मुंबईत सुरू असलेल्या मुसळधार पावसामुळे ही इमारत कोसळली असल्याची शक्यता आहे.