मुंबंई : माजी सामाजिक न्यायमंत्री चंद्रकांत हंडोरे यांना करोनाची लागण झाली आहे. ते राहत असलेल्या चेंबूरच्या लोखंडे मार्ग परिसरात आतापर्यंत २०० करोना बाधित आढळून आले आहेत. चेंबूरमधील करोनाचे सर्वाधिक रुग्ण पी.एल. लोखंडे मार्गावर आहेत. बुधवापर्यंत याठिकाणी १८५ करोनाचे रुग्ण आढळून आले होते. यामध्ये १६ जणांचा मृत्यूदेखील झाला. हंडोरे या परिसरात फिरून अनेकांना मदत करत होते. शिवाय जंतुनाशक फवारणी, धान्यवाटप, पालिका अधिकाऱ्यांना सूचना देणे, नागरिकांसाठी करोना तपासणी शिबीर आयोजित करणे अशा कार्यक्रमांमध्ये त्यांचा सक्रिय सहभाग होता. त्यामुळे ते करोनाबाधितांच्या संपर्कात आल्याचा संशय आहे. एका खासगी रुग्णालयात दाखल केल्यानंतर त्यांच्या दोन करोना चाचण्या झाल्या. दोन्ही चाचण्यांचे अहवाल होकारात्मक आले.
