राज्यातील अभियांत्रिकी महाविद्यालयांची ढासळणारी स्थिती एकीकडे, तर दुसरीकडे याच संस्थांना मोठय़ा प्रमाणात फी वाढविण्यासाठी मिळणारी परवानगी यातून विद्यार्थी संघटना तसेच विद्यार्थी व पालकांमध्ये मोठय़ा प्रमाणात नाराजी निर्माण झाली आहे. ‘शिक्षण शुल्क समिती’बाबत मोठय़ा प्रमाणात येणाऱ्या तक्रारी लक्षात घेऊन अखेर उच्च व तंत्रशिक्षण मंत्रालयाने या समितीच्या सचिवपदी राज्याच्या तंत्रशिक्षण संचालक डॉ. सु.का. महाजन यांची नियुक्ती केली. ‘शिक्षण शुल्क समिती’च्या सचिवपदाचा कार्यभार स्वीकारल्यानंतर झालेल्या बैठकीत समितीचा कारभार पारदर्शक करण्यासाठी संगणकीकरण करून सर्व महाविद्यालये व संस्थांकडून येणारी माहिती वेबसाइटवर टाकण्याचा निर्णय घेतल्याचे डॉ. महाजन यांनी सांगितले
