नवी मुंबईतील खारघर येथील आदित्य प्लॅनेट इमारतीतील मारूती सुझुकीच्या शोरूमला लागलेल्या भीषण आगीत दोन सुरक्षारक्षकांचा होरपळून मृत्यू झाला तर सुमारे ८ ते १० कार जळून खाक झाल्या आहेत. आगीचे कारण अद्याप समजू शकलेले नाही.
खारघर सेक्टर १० मधील आदित्य प्लॅनेट इमारतीत आज (रविवार) पहाटेच्या पाचच्या सुमारास आग लागली. परिसरातील लोकांना आग लागल्याचे समजातच त्यांनी अग्निशामक दल व पोलिसांनी याची माहिती दिली. अग्निशामक दलाने त्वरीत घटनास्थळी धाव घेऊन इमारतीतील सर्व रहिवाशांना प्रथम बाहेर काढले. शोरूममध्ये दोन सुरक्षा जवान अडकले होते. परंतु, आग भीषण असल्यामुळे आत अडकलेल्या दोन्ही सुरक्षारक्षकांचा यात होरपळून मृत्यू झाला. जितेंद्र कुमार व कृष्ण कुमार अशी मृत सुरक्षारक्षकांची नावे आहेत. ही इमारत सायन-पनवेल महामार्गाला लागूनच आहे.