राज्यात टाळेबंदीच्या काळात अतिरिक्त दुधामुळे शेतकऱ्यांचे होणारे नुकसान टाळण्यासाठी दूध खरेदी करून त्यापासून तयार केलेली भुकटी अमृत आहार योजनेतील ६ लाख ५१ हजार मुलांना आणि १ लाख २१ हजार गरोदर, स्तनदा मातांना मोफत देण्याचा निर्णय बुधवारी मुख्यमंत्री उद्धव ठाकरे यांच्या अध्यक्षतेखाली झालेल्या बैठकीत घेण्यात आला. टाळेबंदीत अतिरिक्त दुधाची खरेदी करून त्याची भुकटी करण्याचा निर्णय शासनाने घेतला होता. त्यानुसार एप्रिल ते जुलै या कालवधीत ५ कोटी ९४ लाख ७३ हजार ६०६ लिटर दूध शेतकऱ्यांकडून घेतले असून त्यापासून ४९२७.७०२ मेट्रिक टन दूध भुकटीचे उत्पादन केले. तसेच २५७५. १७१ मेट्रिक टन बटरचेही उत्पादन केले अशी माहिती बैठकीत देण्यात आली. ही भुकटी आणि बटर हे वखार महामंडळाच्या शीतगृहांमध्ये ठेवण्यात आले असून आता ही दूध भुकटी मोफत वाटण्याचा निर्णय घेण्यात आला आहे. बैठकीस दुग्धविकास मंत्री सुनील केदार, राज्यमंत्री दत्तात्रय भरणे व बच्चू कडू आदी उपस्थित होते. दूध भुकटीत प्रोटीनचे प्रमाण ३४ टक्के आहे आणि या कोविड काळात पोषणासाठी ती उपयुक्त असल्याने लहान मुले, स्तनदा व गरोदर मातांना त्याचा अधिक लाभ होईल यामुळे हा निर्णय घेण्यात आला. ही योजना पुढे एक वर्ष राबविण्यात येणार आहे. मुख्यमंत्र्यांनी केंद्र सरकारकडे दूध भुकटीच्या बाबतीत खासदारांमार्फत जोरदार पाठपुरावा करावा अशीही सूचना केली तसेच यासंदर्भात एक पत्रही केंद्राला पाठविण्यात येत आहे असे ते म्हणाले. भुकटी पुरविण्याचे व्यवस्थित नियोजन करण्याची सूचना मुख्यमंत्र्यांनी या वेळी केली.