प्रियकरासोबत बेडरुममध्ये असताना अचानक आई घरी आल्याने एका तरुणीने खिडकीतून उडी मारल्याची घटना समोर आली आहे. कुर्ल्यामध्ये ही घटना घडली आहे. अल्पवयीन तरुणी प्रियकरासोबत बेडरुममध्ये होती. आई अचानक घरी आल्याने आपल्या पहिल्या माळ्यावरील फ्लॅटच्या खिडकीतून तिने उडी मारली अशी माहिती पोलिसांनी दिली आहे. तरुणीच्या पायाला जखम झाली असून पायाचे हाड तुटलं आहे. पोलिसांनी दिलेल्या माहितीनुसार, शुक्रवारी संध्याकाळी बैल बाजार परिसरात ही घटना घडली. "१७ वर्षीय मुलगी आपल्या प्रियकरासोबत बेडरुममध्ये होती. आपली आई घरी आली आल्याचं लक्षात येताच तिने प्रियकराला पळ काढण्यास सांगितलं. नंतर तिनेही खिडकीतून उडी मारली. इतक्या उंचीवरुन उडी मारल्याने तिच्या पायाचं हाड तुटलं आहे," असं पोलिसांनी सांगितलं आहे. तरुणीने नंतर आपल्या कुटुंबीयांकडे कबुली देत प्रियकरासोबत बेडरुममध्ये असल्याने घाबरलो होतो असं सांगितलं आहे. तरुणीच्या प्रियकराची ओळख पटली असून सुनील झेंडे असं त्याचं नाव आहे. "मुलीच्या कुटुंबीयांनी दिलेल्या तक्रारीनंतर आम्ही तरुणाला अटक केली असून त्याच्यावर बलात्कार, घरात घुसखोरी आणि पॉक्सो अंतर्गत गुन्हा दाखल केला आहे," असं पोलिसांनी सांगितलं आहे.
