घाटकोपरमध्ये एका महिलेचा मृतदेह आढळला आहे. बेडशीटमध्ये गुंडाळून हा मृतदेह घाटकोपर पश्चिमेला एका नाल्याजवळ टाकून देण्यात आला होता. पोलिसांनी अज्ञात व्यक्तीविरोधात हत्येचा गुन्हा दाखल केला आहे. पोलिसांनी दिलेल्या माहितीनुसार, विद्याविहार येथील एसटी वर्कशॉपच्या बाहेर सकाळी ९.३० वाजण्याच्या सुमारास हा मृतदेह आढळून आला. पोलिसांनी मृतदेह पाहिला तेव्हा त्याचं शीर आणि पायाचा खालील भाग कापला असल्याचं निष्पन्न झालं. मृतदेह सापडल्यानंतर परिसरात खळबळ माजली आहे. मॉर्निग वॉकसाठी आलेल्या दोन महिलांनी सर्वात प्रथम मृतदेह पाहिला असल्याचं एका स्थानिकाने सांगितलं आहे. "सर्वात आधी त्यांना कोणीतरी कचरा टाकला असावा असं वाटलं. त्यांनी वर्कशॉपच्या सुरक्षारक्षकांना यासंबंधी कळवलं. कर्मचाऱ्यांनी जवळ जाऊन पाहिलं असता बेडशीटवर रक्ताचे डाग असल्याचं लक्षात आलं. त्यामुळे त्यांनी लगेच पोलिसांना फोन केला," असं स्थानिकाने सांगितलं आहे. घाटकोपर पोलीस ठाण्याचे वरिष्ठ पोलीस निरीक्षक कुसुम वाघमारे यांनी दिलेल्या माहितीनुसार, "पीडित महिलेचं वय ३० च्या आसपास असावं असा अंदाज आहे. मृतदेह शवविच्छेदनासाठी राजावाडी रुग्णालयात नेण्यात आला. महिलेची ओळख पटवण्याचा प्रयत्न सुरु आहे". पोलीस सध्या सीसीटीव्हीच्या माध्यमातून काही माहिती मिळतीये का यासाठी प्रयत्न करत आहेत.