बोरीवली पूर्वेला एका गगनचुंबी इमारतीच्या लिफ्टमध्ये महिलेचा विनयभंग करुन तिचा मोबाईल चोरण्याचा प्रयत्न केल्या प्रकरणी एका २१ वर्षीय तरुणाला पोलिसांनी अटक केली आहे. ही घटना मंगळवारी घडली. इमारतीच्या सुरक्षारक्षकांनी आरोपी नवीन पटेलला अटक करुन त्याला पोलिसांच्या ताब्यात दिले. विनयभंग केल्याच्या आरोपाखाली त्याला अटक करण्यात आली आहे. नवीन पटेल आणि संबंधित महिला दोघेच लिफ्टमध्ये होते. त्यावेळी पटेलने अचानक महिलेला मिठी मारुन तिला स्पर्श केला. लिफ्ट १२ व्या मजल्यावर पोहोचल्यानंतर दरवाजा उघडताच पटेलने त्या महिलेच्या हातातील मोबाईल हिसकावून पळण्याचा प्रयत्न केला. त्यावेळी महिलेने आरडाओरडा केला. आरोपी गोंधळल्यामुळे तो पायऱ्यांच्या दिशेने पळाला. महिलेने लगेचच तळमजल्याच्या दिशेने जाणारे लिफ्टचे बटण दाबले. खाली पोहोचल्यानंतर तिने लगेच सुरक्षा रक्षकांना घडला प्रकार सांगितला. सुरक्षा रक्षाकांनी नवीन पटेलला पकडले व नंतर पोलिसांच्या ताब्यात दिले.
