छत्रपती शिवाजी महाराज टर्मिनसवर लोकलने बंपरला धडक दिली आहे. फलाट क्रमांक तीनवर हा प्रकार घडला आहे. मिळालेल्या माहितीनुसार, कल्याण दिशेकडून आलेली धिमी लोकल छत्रपती शिवाजी महाराज टर्मिनसमध्ये फलाट क्रमांक तीनवर आली असता बंपरला धडकली. सुदैवाने या दुर्घटनेत कोणताही प्रवासी जखमी झालेला नाही. मोटरमनने आपत्कालीन ब्रेक कार्यान्वित केल्यामुळे मोठी दुर्घटना टळली. लोकल बंपरला धडकली असल्याची माहिती मिळताच आरपीएफ तसंच रेल्वे अधिकारी घटनास्थळी पोहोचले होते. काही वेळासाठी फलाट क्रमांक तीनवरील वाहतूक बंद करण्यात आली आहे. दरम्यान नेमका कशामुळे हा प्रकार घडला याची मध्य रेल्वे चौकशी करणार असून तसा आदेश देण्यात आला आहे.
