शहरातील लहान मुलांच्या अपहरणाच्या घटनांमध्ये वाढ होत असताना पायधुनी येथे एका सात महिन्यांच्या मुलीला पळवून नेण्याचा प्रयत्न फसला आहे. पालकांना वेळीच लक्षात आल्याने एका टॅक्सीचालकाच्या मदतीने अपहरणकर्त्यांला पकडण्यात यश आले आहे. जेजे उड्डाणपुलाखालील सिग्नलजवळ जावेद शेख आणि रेश्मा हे दाम्पत्य सात महिन्यांच्या शबानासह राहते. शनिवारी रात्री ते याच ठिकाणच्या शेगडी हॉटेलजवळील पदपथावर शबानासह झोपले होते. मध्यरात्री दीडच्या सुमारास रेश्माला जाग आली असता मुलगी नसल्याचे लक्षात आले. त्यांनी त्वरित शोधाशोध सुरू केली. दरम्यान एका टॅक्सीचालकाने एक इसम मुलीला घेऊन जात असल्याचे पाहिले होते. त्याने शेख दाम्पत्याला आपल्या टॅक्सीत बसवून आरोपीचा शोध सुरू केला. काही वेळातच महम्मद अली रोडवर आरोपी जावेद शेख मुलीला घेऊन जात असल्याचे त्यांना दिसला. गस्तीवरील पोलिसांना हा प्रकार सांगताच त्यांनी जावेदला ताब्यात घेतले. पायधुनी पोलिसांनी जावेदला अपहरणाच्या गुन्ह्यात अटक केली. रविवारी त्याला न्यायालयात हजर केले असता २८ जुलैपर्यंत पोलीस कोठडी देण्यात आली आहे.
