भरधाव वेगाने गाडी चालविणाऱ्या एका तरुणीने पोलीस हवालदाराला जोरदार धडक दिली. या धडकेत या पोलिसाच्या पायाला दुखापत झाली आहे. मालाडच्या काचपाडा जंक्शन येथे बुधवारी दुपारी ही घटना घडली. खुशबू गोलाम (२७) असे वाहनचालक तरुणीचे नाव असून तिला प्रथम अटक करून नंतर जामिनावर सुटका करण्यात आली.
काचपाडा जंक्शन येथे दुपारी बांगुर नगर पोलीस ठाण्याचे कर्मचारी वाहन तपासणी करत होते. पोलीस हवालदार प्रकाश रामचंद्र बड्डी हे एक वाहन थांबवत असताना रस्त्याच्या मध्ये आले होते. त्यावेळी वेगाने आलेल्या एका आय टेन गाडीने त्यांना धडक दिली. त्यात त्यांच्या पायाला दुखापत झाली. त्यांच्यावर डायमंड रुग्णालयात उपचार सुरू आहेत.