जकात दलालांनी महापालिकेच्या विधी समितीचे अध्यक्ष अ‍ॅड. मकरंद नार्वेकर यांना महापालिका मुख्यालयात येऊन दिलेल्या धमकीचे परिणाम गुरुवारी विधी समितीच्या बैठकीतही उमटले आणि ही बैठक तहकूब करण्यात आली. शिवसेनेचे रमाकांत रहाटे यांनी सभा तहकुबी मांडली होती. महापालिका विधी समितीच्या अध्यक्षांना महापालिका मुख्यालयात येऊन धमकी देण्यापर्यंत जकात दलालांची मजल गेली असून अधिकारी आणि जकात दलाल यांच्या संगनमताने असे प्रकार घडत आहेत. जकात चोरांचे हे रॅकेट पूर्णपणे मोडून काढावे, असे रहाटे यांनी सांगितले. रहाटे यांनी मांडलेल्या सभा तहकुबीला सर्वपक्षीय सदस्यांनी पाठिंबा दिला आणि या प्रकाराच्या निषेधार्थ सर्वानी सभात्याग केला. अखेर ही बैठक तहकूब करण्यात आली.
