अंधेरीत मरोळमधील विजय नगर येथील वूडलँड सोसायटीत बिबटया आढळल्याने एकच खळबळ उडाली आहे. सोसायटीच्या सीसीटीव्ही कॅमेऱ्यात बिबटयाच्या मुक्तपणे सुरु असलेला वावर कैद झाला आहे. वन खात्याचे अधिकारी घटनास्थळी पोहोचले असून या बिबटयाला पकडण्याचे प्रयत्न सुरु आहेत.

वूडलँड ही रहिवाशी सोसायटी आहे. इमारतीच्या जिन्याखाली हा बिबटया लपून बसला होता. जंगलातून भक्ष्याच्या शोधात तो या सोसायटीपर्यंत आल्याची शक्यता आहे. वूडलँड सोसायटीपासून काही अंतरावर संजय गांधी नॅशनल पार्क आहे.

आरे कॉलनीपासून १०० मीटरच्या अंतरावर हा परिसर आहे. बिबटया सोसायटीत शिरल्यामुळे इमारतीमध्ये राहणारे रहिवाशी हादरले आहेत. बघ्यांनी सुद्धा इथे गर्दी केली असून बिबटयाला पकडण्यासाठी वनविभागेच ऑपरेशन सुरु आहे.