News Flash

मतदारसंघ ईशान्य मुंबई : मतदारांचा उत्साह आणि अफवांना ऊत

मतदान यंत्रावरील शाईच्या खुणेमुळे मुलुंडमध्ये गोंधळाचे वातावरण

संग्रहित छायाचित्र

मतदान यंत्रावरील शाईच्या खुणेमुळे मुलुंडमध्ये गोंधळाचे वातावरण

मुंबई : लोकसभा निवडणुकीच्या मतदानावेळी ईशान्य मुंबईत नवमतदारांपासून वृद्धांपर्यंत सर्व वयोगटांतील मतदार मोठय़ा संख्येने मतदानासाठी केंद्रांवर दिसले. यात उत्साह होता, हुरहुरही होती आणि अफवांमुळे थोडा संभ्रमही होता.

सकाळी सातच्या सुमारास या मतदारसंघातील दोन प्रमुख प्रतिस्पर्धी संजय पाटील, मनोज कोटक यांनी आपल्या कुटुंबासह मतदान केले. पाटील यांनी भांडुप पश्चिमेकडील आयडीयूबीएस महाविद्यालयातील केंद्रावर तर कोटक यांनी मुलुंड कॉलेज ऑफ कॉमर्स येथील केंद्रावर मतदान बजावले. मतदान सुरू होण्याआधीपासूनच येथील बहुतांश केंद्रांवर मतदारांनी रांगा लावल्या होत्या. त्यात मॉर्निग वॉकला बाहेर पडलेल्या मध्यमवयीन, वृद्ध आणि नोकरदार वर्गाचा सहभाग होता. त्यामुळे दोन्ही उमेदवारांना १५ ते २० मिनिटे रांगेत उभे राहावे लागले. सकाळच्या वेळेतली केंद्रांवरील गर्दी उत्तरोत्तर वाढत गेली. सकाळी दहा वाजल्यानंतर महिलांची गर्दी केंद्रांवर दिसू लागली.

येथील प्रत्येक केंद्रावर कडेकोट बंदोबस्त होता. बंदोबस्तावरील पोलीस, निवडणूक कर्मचारी केंद्रावर आलेल्या मतदारांना बूथप्रमाणे मार्गदर्शन करत होते. येथील बहुतांश केंद्रांवर पुरुष, महिला मतदारांसाठी स्वतंत्र रांगांची व्यवस्था दिसली. पोलीस रांगेतील वृद्धांना, ज्येष्ठ नागरिकांना थेट केंद्रात आणताना दिसले. अपंग, वयोवृद्धांसाठी खुर्चीला बांबू जोडून केलेल्या तात्पुरत्या पालख्या सज्ज होत्या. मोठय़ा केंद्रांवर प्रथमोपचार पुरवणारे वैद्यकीय अधिकारी, रुग्णवाहिका तैनात होत्या.

मतदान उत्साहात सुरू असताना मुलुंडच्या होली एंजल मतदान केंद्रातील मतपेटीवर भाजप उमेदवाराच्या नावापुढे शाईने खूण केल्याची अफवा उठली. मतदान करण्यासाठी आलेल्या मतदारांनीच ही तक्रार केली आणि मतदान तासाभरासाठी खोळंबले. प्रत्यक्षात या मतदान केंद्रावर ज्येष्ठ नागरिक मतदारांची संख्या तुलनेने जास्त होती. प्रत्यक्ष मतदानाआधीच्या प्रक्रियेत स्वाक्षरी किंवा अंगठय़ाचा ठसा उमटवणे बंधनकारक होते. ज्येष्ठांपैकी अनेकांनी अंगठा उमटवला. अंगठय़ावरील शाई बटणाच्या आसपास पसरली, असे स्पष्टीकरण निवडणूक निर्णय अधिकाऱ्यांनी दिले. यंत्र बदलण्याचा निर्णय घेण्यात आला. असाचा गोंधळ मुलुंड पूर्वेकडील पुरंदरे शाळेतील केंद्रावरही घडला होता.

लोकसत्ता आता टेलीग्रामवर आहे. आमचं चॅनेल (@Loksatta) जॉइन करण्यासाठी येथे क्लिक करा आणि ताज्या व महत्त्वाच्या बातम्या मिळवा.

First Published on April 30, 2019 3:45 am

Web Title: lok sabha election 2019 voting in mumbai north east constituency 2
Next Stories
1 मतदारसंघ दक्षिण मुंबई : अमराठी मतदारांची गर्दी
2 मतदारसंघ वायव्य मुंबई : उन्हाची पर्वा न करता मतदानाचे कर्तव्य
3 मतदारसंघ उत्तर मुंबई : चर्चेतल्या मतदारसंघाची मतदानातही सरशी
Just Now!
X