मालेगाव बॉम्बस्फोटाशी संबंधित महत्त्वाची कागदपत्रे न्यायालयातून गहाळ झाल्याबद्दल काँग्रेस- राष्ट्रवादीच्या सदस्यांनी विधानसभेत गुरुवारी राज्य सरकावर जोरदार टीका केली. आरोपींना सरकार मदत करीत असल्याचा आरोपही करण्यात आला. मालेगाव स्फोटाशी संबंधित कागदपत्रे गहाळ झाल्याचा मुद्दा राष्ट्रवादीचे जयंत पाटील यांनी उपस्थित केला. मुलुंड स्फोटातील आरोपींनी कालच शिक्षा झाली, पण मालेगाव स्फोटातील आरोपींचा जबाब असल्याची कागदपत्रे गहाळ झाली आहेत. ही गंभीर घटना असून, आरोपींना मदत व्हावी या उद्देशानेच हे सारे घडवून आणल्याचा आरोप जितेंद्र आव्हाड (राष्ट्रवादी) यांनी केला. सरकारने याची चौकशी करावी, अशी मागणी आस्लम शेख, नसिम खान, अमिन पटेल (काँग्रेस) यांनी केली. न्यायालयाच्या ताब्यातील कागदपत्रे जर गहाळ झाली असतील तर सरकारचा संबंध काय, असा सवाल महसूलमंत्री एकनाथ खडसे यांनी केला. ..तर अधिकाऱ्यांना निलंबित करणार राज्य परिवहन महामंडळाच्या शिवनेरी बसमधून मुंबई-पुणे असा फुकट प्रवास करणे एसटीच्या दोन अधिकाऱ्यांच्या अंगलट आले आहे. त्यांच्यावर आता निलंबनाची कारवाई करण्याचे सूतोवाच परिवहनमंत्री दिवाकर रावते यांनी गुरुवारी विधान परिषदेत केले. मुंबई-पुणे शिवनेरी बसमधून फुकट प्रवास करणाऱ्या एस.टी. साबळे व ए.पी. चोपडे या एसटीच्या अधिकाऱ्यांना पकडण्यात आले होते.
