माथाडी कामगारांचे नेते आणि अखिल भारतीय माथाडी ट्रान्सपोर्ट व जनरल कामगार युनियनचे सरचिटणीस बाबुराव रामिष्टे यांचे गुरुवारी दुपारी दीर्घ आजाराने मुंबईत निधन झाले. ते ६५ वर्षांचे होते. त्यांच्या पश्चात दोन पुत्र, एक कन्या असा परिवार आहे. गेल्या काही महिन्यांपासून रामिष्टे यांच्यावर एका खासगी रुग्णालयात उपचार सुरु होते. माथाडी कामगार नेते अण्णासाहेब पाटील यांच्या नेतृत्वाखाली संघटना स्थापण्यात रामिष्टे यांचा सहभाग होता. ‘माथाडी कामगारांचा लढाऊ नेता’ अशी रामिष्टे यांची ओळख होती. वेठबिगाराप्रमाणे राबणाऱ्या माथाडी कामगारांच्या संरक्षणासाठी कायदा करण्याचे महत्वाचे काम त्यांनी केले. माथाडी कामगारांना मालकी हक्काची घरे मिळावित यासाठी त्यांनी सादर केलेली योजना राज्य शासनानेही स्वीकारली. मात्र त्यावर अद्याप कार्यवाही झालेली नाही. शुक्रवारी सकाळी नऊ वाजल्यापासून रामिष्टे यांचे पार्थिव कर्नाक बंदर येथे अंत्यदर्शनासाठी ठेवण्यात येणार आहे. दुपारी बारानंतर शिवाजी पार्क स्मशानभूमीत त्यांच्या पार्थिवावर अंत्यसंस्कार होणार आहेत.