दूध उत्पादक शेतकऱ्यांच्या खात्यावर प्रती लिटर १० रुपयांचे अनुदान द्यावे तसेच दूध भुकटीच्या निर्यातीसाठी किलोमागे ५० रुपये अनुदान द्यावे या मागणीसाठी भाजप तसेच किसान सभेने शनिवारी राज्यभर केलेल्या आंदोलनास शेतकऱ्यांचा प्रतिसाद मिळाला. या प्रश्नावर सरकारने वेळीच तोडगा काढला नाही तर आंदोलन अधिक तीव्र करण्याचा इशारा भाजपने दिला आहे. दूध दरवाढीसाठी भाजपच्या नेतृत्वाखाली महायुतीतर्फे राज्यभर अहिंसक मार्गाने ठिकठिकाणी आंदोलन करण्यात आले. प्रदेशाध्यक्ष चंद्रकांत पाटील यांच्या नेतृत्वाखाली पुणे जिल्ह्य़ात तर पक्षाच्या अन्य नेत्यांच्या नेतृत्वाखाली विविध जिह्य़ात आंदोलन करण्यात आले. मुंबईत पक्षातर्फे गोरेगावमध्ये महानंद डेअरीच्या समोर आंदोलन करण्यात आले.
