पाण्याची नादुरुस्त असलेली पाइपलाइन दुरुस्त करण्यास विलंब झाल्याबद्दल कल्याण-डोंबिवली महापालिकेतील महाराष्ट्र नवनिर्माण सेनेचे नगरसेवक नितीन निकम यांनी एका खासगी कंत्राटदारास अनेक लोकांसमोर मारहाण केल्याचे वृत्त आहे. डी.जी.पाटील हे कंत्राटदार ६५ वर्षांचे असून निकम यांनी त्यांना मारहाण केल्याचे दृश्य दूरचित्रवाणीच्या वृत्तवाहिन्यांवरून सातत्याने दाखविण्यात येत होते. पाटील हे कल्याण-डोंबिवली महापालिकेचे खासगी कंत्राटदार आहेत. गणेशवाडी भागात सध्या पाण्याचा तुटवडा असून पाणीपुरवठा करणाऱ्या पाइपलाइनमध्ये निर्माण झालेला बिघाडच त्यास कारणीभूत ठरल्याची स्थानिक नागरिकांची तक्रार होती. याप्रकरणी पाटील यांच्याकडे दुरुस्तीसंबंधी तक्रारी करूनही दाद मिळत नसल्यामुळे संतप्त झालेल्या निकम यांनी त्यांना मारहाण केल्याचे सांगण्यात आले.
