25 February 2021

News Flash

मुंबईत मास्क घातला नाही, तर १ हजार रुपये दंड? खुद्द पोलीस आयुक्तांनीच सांगितलं सत्य!

मुंबईत मास्क न घातल्यास १ हजार रुपये दंड होणार असल्याचे मेसेज सध्या व्हायरल होत आहेत. पोलीस आयुक्तांनी खरी परिस्थिती सांगितली आहे.

संग्रहीत

करोनाच्या पाठोपाठ देशात अफवांचा व्हायरस देखील मोठ्या प्रमाणावर व्हायरल होऊ लागला आहे. देशात करोनाचा शिरकाव झाल्यापासून अशा अनेक अफवा सोशल मीडियावरच पसरू लागल्या होत्या. त्यामुळे करोनाी लढा देणाऱ्या प्रशासनासाठी हे काम अधिकच कठीण होऊन बसलं होतं. आता त्यामध्ये अजून एका अफवेची भर पडली आहे. ही अफवा इतक्या मोठ्या प्रमाणावर व्हायरल होऊ लागली, की काळजीपोटी खुद्द मुंबईचे पोलीस आयुक्त परमबीर सिंह यांनाच त्यावर समोर येऊन खुलासा करावा लागला!

गेल्या काही दिवसांपासून सोशल मीडियावर एक संदेश व्हायरल केला जात आहे. यामध्ये मुंबईत जर सार्वजनिक ठिकाणी मास्क घातला नाही, तर त्यासाठी १ हजार रुपये दंड ठोठावला जाईल, असं म्हटलं आहे. पण वास्तवात मुंबईत मास्क न वापरल्यास २०० रुपये दंड ठोठावला जातो. मुंबईच्या पोलीस आयुक्तांनी याबाबत ट्वीट करून माहिती दिली आहे.

पुन्हा फेक न्यूज!

‘प्रिय मुंबईकर! आपल्याला फेक न्यूज विकणारे पुन्हा एकदा सक्रीय झाले आहेत. यावेळी ते म्हणतात की मास्क घातला नाही, तर तुम्हाला १ हजार रुपये दंड केला जाईल. तुमच्या सुरक्षेशी झालेली तडजोड कितीही मोठी रक्कम असली, तरी भरून निघणार नाही. पण दंडाची रक्कम म्हणाल, तर मास्क न घातल्याबद्दल तुम्हाला मुंबईत २०० रुपये दंड ठोठावला जातो’, असं परमबीर सिंह यांनी ट्वीटमध्ये म्हटलं आहे.

 

नुकतीच मुंबई महानगर पालिकेने अशा प्रकारे दंडातून किती रक्कम जमा केली, याची आकडेवारी समोर आली होती. यामध्ये गेल्या वर्षी मार्च महिन्यात करोना लॉकडाऊन लागू झाल्यापासून मुंबई महानगर पालिकेने आत्तापर्यंत तब्बल ३२ कोटी ४१ लाख १४ हजार इतकी रक्कम जमा केली आहे. तसेच, आत्तापर्यंत दंड करण्यात आलेल्या लोकांचा आकडा देखील १६ लाखांहून जास्त झाला आहे.

 

दरम्यान, करोनाचे रुग्ण पुन्हा एकदा वाढू लागले असून मुंबई आणि उर्वरीत महाराष्ट्रातही करोनाची दुसरी लाट येण्याची शक्यता तज्ज्ञांकडून वर्तवण्यात येत आहे. त्यामुळे मास्क, सोशल डिस्टन्सिंग आणि हात वेळोवेळी धुणे या उपायांचा अवलंब करण्याचं आवाहन प्रशासनाकडून करण्यात येत आहे.

लोकसत्ता आता टेलीग्रामवर आहे. आमचं चॅनेल (@Loksatta) जॉइन करण्यासाठी येथे क्लिक करा आणि ताज्या व महत्त्वाच्या बातम्या मिळवा.

First Published on February 23, 2021 3:57 pm

Web Title: mumbai cp parambir singh clarifies on no mask 1000 rupees fine viral message pmw 88
Next Stories
1 गँगस्टर रवी पुजारीला बंगळुरूवरून मुंबईत आणलं; ९ मार्चपर्यंत पोलीस कोठडी
2 ‘जे बोलतो ते करतो म्हणालात, पण मग…’ आशिष शेलारांचा शिवसेनेला खोचक सवाल!
3 अंधेरीला न थांबताच पुढे गेली ‘तेजस एक्सप्रेस’, उतरणारे ४२ प्रवासी झाले त्रस्त; नंतर…
Just Now!
X