News Flash

मुंबईचा पारा ३७ अंश सेल्सियसवर

ऑक्टोबरआधीच सुरू झालेल्या उन्हाच्या तडाख्याने मुंबईकरांना शतकातील सर्वाधिक तापदायक सप्टेंबर अनुभवावा लागत आहे. सांताक्रूझ येथे सोमवारी ३७ अंश सेल्सिअस तापमानाची नोंद झाली असून हे सप्टेंबरमधील

| September 30, 2014 04:36 am

ऑक्टोबरआधीच सुरू झालेल्या उन्हाच्या तडाख्याने मुंबईकरांना शतकातील सर्वाधिक तापदायक सप्टेंबर अनुभवावा लागत आहे. सांताक्रूझ येथे सोमवारी ३७ अंश सेल्सिअस तापमानाची नोंद झाली असून हे सप्टेंबरमधील १०० वर्षांतील सर्वाधिक तापमान आहे.
पाऊस जाण्यासाठी जणू टपून बसलेल्या उन्हाने मुंबई आणि परिसराचा ताबा घेण्यास सुरुवात केली. त्यातच हवेतील बाष्प एकदम कमी झाल्याने तापमानवाढीवर नियंत्रण राहिले नाही. जमिनीवरून येत असलेल्या वाऱ्यांमुळे तापमान वाढायला अधिक मदत झाली. शनिवारी ३५.३ अंश से., रविवारी ३५.६ अंश से. तर सोमवारी थेट ३७ अंश से. तापमानाची नोंद झाली. सप्टेंबर हा पावसाचा निरोपाचा महिना मानला जातो. साधारणत: पावसाने पाय मागे घेतल्यावर ऑक्टोबरमध्ये मुंबईतील तापमान वाढते. मात्र यावेळी पावसाचा प्रभाव सप्टेंबरच्या पहिल्या आठवडय़ात कमी झाल्याने ऑक्टोबर हीटने लवकर प्रवेश केला आहे.
हा ऋतू बदलण्याचा काळ आहे. त्यामुळे वाऱ्यांची दिशा सतत बदलत राहते. समुद्रावरून येणाऱ्या दमट वाऱ्यांमुळे शहराचे  तापमान नियंत्रणात राहते. मात्र आता जमिनीवरून आग्नेय दिशेनेही वारे येत आहेत. त्यामुळे तापमान वाढत आहे. त्यातच मान्सूनच्या वाऱ्यांमुळे हवेत गेले काही महिने असलेले बाष्पही अचानक कमी झाले आहे, असे मुंबई हवामानशास्त्र विभागाचे संचालक व्ही. के. राजीव म्हणाले. पुढील काही दिवस परिस्थितीत फारसा बदल होणार नसल्याचेही त्यांनी स्पष्ट केले.
यावेळी ऑक्टोबरचाही विक्रम मोडणार?
गेल्या दशकभरात २०१०चा अपवाद वगळता सप्टेंबरमध्ये कमाल तापमान ३२ ते ३३ अंश सेल्सिअस दरम्यान राहिले होते. यापूर्वी सप्टेंबरमधील सर्वाधिक तापमान २३ सप्टेंबर १९७२ रोजी ३६.४ अंश से. नोंदले गेले. ऑक्टोबर महिन्यातील सर्वाधिक तापमान २३ ऑक्टोबर १९७२ रोजी ३७.९ अंश से. नोंदले गेले. हे दोन्ही दिवस एकाच वर्षांतील आहेत. तसेच यावर्षी, १० जून रोजी ३८ अंश से. तापमानाची नोंद झाली. हे तापमानही जूनमधील शतकातील सर्वाधिक तापमान होते. यावेळची तापमानाची एकूण स्थिती पाहता ऑक्टोबर महिन्यात तापमानाच्या नव्या विक्रमाची नोंद होणे अगदीच अशक्य नाही.

लोकसत्ता आता टेलीग्रामवर आहे. आमचं चॅनेल (@Loksatta) जॉइन करण्यासाठी येथे क्लिक करा आणि ताज्या व महत्त्वाच्या बातम्या मिळवा.

First Published on September 30, 2014 4:36 am

Web Title: mumbai temperature at 37 degrees in september
टॅग : Weather Forecast
Next Stories
1 कागदी, प्लास्टिक राष्ट्रध्वजाचा वापर बंदीबाबत ३० नोव्हेंबपर्यंत निर्णय घेण्याचे आदेश
2 चव्हाण यांनी पदाचा दुरुपयोग केला नसल्याचा पुरावा द्या!
3 मुख्यमंत्री कोटय़ातील घरांची माजी न्यायाधीशांमार्फत चौकशी
Just Now!
X