स्वप्ननगरी मुंबईचे दर्शन करण्यासाठी देशभरातून आणि विदेशातून पर्यटक भेट देतात. आता मुंबईचे दर्शन पर्यटकांना एकाच ठिकाणाहून करता येणार आहे. तब्बल 285 फुटांवरुन पर्यटकांना मुंबई पाहता येणार आहे. त्यासाठी मुंबई महापालिकेकडून प्रेक्षक गॅलरी उभारण्याचे काम अंतिम टप्यात आले आहे. मलबार हिलमधल्या हॅगिंग गार्डनशेजारी ११ कोटी रूपयांचा खर्च करून मुंबई महापालिका प्रेक्षक गॅलरी उभारली जाणार आहे. परदेशात जसा अनुभव घेता येतो तसाच अनुभव या गॅलरीतून आपल्याला मिळणार आहे. प्रेक्षक गॅलरीत दुर्बीण आणि टेलिस्कोपही बसवले जाणार आहेत. या प्रेक्षक गॅलरीतून नरीमन पॉईंटचा क्वीन्स नेकलेस, निळाशार समुद्र, गिरगाव चौपाटी आणि मुंबईचं इतर वैभव पाहता येणार आहे. या प्रेक्षक गॅलरीचे काम जवळपास पूर्ण झालं असून लवकरच याचा लोकार्पण सोहळा पार पडणार आहे. शिवसेनेच्या पाठपुराव्यातून होणाऱ्या या मुंबईच्या प्रेक्षक गॅलरीला दिवंगत शिवसेना नेते प्रमोद नवलकर यांचं नाव देण्यात येणार आहे. या प्रेक्षक गॅलरीमध्ये एकाच वेळी 50 प्रेक्षक मुंबई दर्शनचा अनुभव घेऊ शकतात. सुरक्षेसाठी खास काचेचे तावदान बसवण्यात येणार आहे. त्याचप्रमाणे पर्यटकांवर सीसीटीव्ही कॅमेऱ्यांची नजर राहणार आहे.
