मुंबई अहमदाबाद महामार्गावरील वर्सोवा येथे वसई खाडीवर असलेला नवा पूल रविवारी सकाळी सर्व वाहनांसाठी खुला करण्यात आला. पुलाच्या दुरुस्तीच्या कामासाठी 8 डिसेंबरपासून हा पूल अवजड वाहनांसाठी बंद करण्यात आला होता, तसेच पुलाची केवळ एकच बाजू हलक्या वाहनांसाठी सुरू ठेवण्यात आली होती . त्यामुळे या मार्गावर गेल्या काही दिवसांपासून वाहतूक कोंडी होत होती. पुलाच्या दुरुस्तीच्या निर्धारित वेळापत्रकानुसार काम 25 डिसेंबरपर्यंत पूर्ण होणार होते . मात्र काम मुदतीआधीच म्हणजे 21 डिसेंबरला पूर्ण झाले. त्यांनतर आवश्यक असलेल्या 24 तासांच्या क्यूरिंग नंतर 23 डिसेंबरला सकाळी 9 वाजल्यापासून पूल सर्व प्रकारच्या वाहनांसाठी खुला करण्यात आला अशी माहिती राष्ट्रीय महामार्ग प्राधिकरणाकडून देण्यात आली.
