मुंबई : नवजात बालिकेला इमारतीवरून फेकल्याने तिचा मृत्यू झाल्याची घटना कांदिवलीत गुरुवारी दुपारी घडली. या मुलीची नाळही शाबूत असून, एका महिलेने तिला फेकल्याचे पोलीस तपासात आढळले आहे.

कांदिवली पश्चिम येथील जय भारत गृहनिर्माण सोसायटीत गुरुवारी दुपारी नवजात अर्भक सापडल्याची माहिती स्थानिकांनी पोलिसांना कळविली. त्यानंतर कांदिवली पोलिसांनी घटनास्थळी जाऊन पाहणी केली. त्यांनी तातडीने ते अर्भक कांदिवलीच्या शताब्दी रुग्णालयात नेले. परंतु त्याआधीच ते मृत झाल्याचे रुग्णालय प्रशासनाने सांगितले.

अभिलाख नगरमधील जय भारत सोसायटीच्या बी विंगमध्ये सापडलेले अर्भक मुलगी असून तिला इमारतीवरून खाली फेकल्याचे तपासात समोर आले आहे. तिला फेकणाऱ्या महिलेची ओळख पटलेली आहे.

या महिलेला वैद्यकीय उपचारांची गरज आहे. प्रकृती सुधारल्यानंतर पुढील कारवाई केली जाईल, असे वरिष्ठ अधिकाऱ्यांनी स्पष्ट केले. तूर्तास या प्रकरणी कांदिवली पोलीस ठाण्यात अपघाती मृत्यूची नोंद झाली असून पुढील तपास सुरू आहे.