पेट्रोल पंपावर दरोडा घालण्यासाठी येणाऱ्या टोळीची माहिती मिळाल्याने सापळा रचून ठाणे गुन्हे शाखेच्या पोलीस पथकाने चार जणांना अटक केली असून त्यांचा एक साथीदार मात्र पळून गेला. सतीश कोळी (५३) वांगणी, अलेक्झांडर तेवेंद्रा (३०) वांगणी, गिरीष नायर (२९) कळवा, भरत बिंदर (३०) कळवा अशी अटक आरोपींचे नावे असून त्यांच्यावर चोरी, घरफोडी, दरोडय़ांची गुन्हे दाखल आहेत.शिळ डायघर येथील शुभम बार अॅण्ड रेस्टॉरेंट समोरील एका पेट्रोल पंपावर दरोडा घालण्याच्या तयारीत असलेल्या दरोडेखोरांची माहिती पोलीसांना मिळाली होती. त्यानुसार एका पोलीसांनी या भागात सापळा रचला होता. संशयीत पाच आरोपी पेट्रोलपंपाच्या दिशेने निघाले असता पोलीसांनी त्यांना पकडण्यासाठी हालचाल केली. त्यावेळी त्यांनी पळून जाण्याचा प्रयत्न केला मात्र त्यातील चौघांना पोलीसांनी अटक केली. तर त्यांचा एक साथीदार मात्र तेथून पसार झाला. अटक आरोपींकडून देशी बनावटीचा कट्टा, दोन चॉपर, मिरची पुड, रस्सी व एक टॉय गन हस्तगत केली. वरिष्ठ पोलीस निरीक्षक रविंद्र डोईफोडे यांच्या पथकाने ही कारवाई पार पाडली.
