मुंबईतल्या परळ गावातील मुकुंद आनंद नगर परिसरात असलेल्या एका गोडाऊनला लागलेल्या भीषण आगीवर नियंत्रण मिळण्यात अग्निशमन दलाला यश आलं आहे. शनिवारी दुपारी ४.३० वाजण्याच्या सुमारास येथील प्रिंटिंग प्रेसच्या गोडाऊनला आग लागली होती. ही आग अग्निशमनच्या जवानांनी पाच तासांच्या अथक प्रयत्नानंतर म्हणजे रात्री ९ वाजण्याच्या सुमारास विझवली. आजुबाजूला वस्ती असल्याने आगीवर तात्काळ नियंत्रण मिळवणं गरजेचं होतं. अन्यथा मोठी दुर्घटना झाली असती. पण सुदैवाने घटनेत कोणीतीही हानी झालेली नाही. अरुंद गल्ल्यांमुळे अग्निशमन दलाच्या जवानांना आग विझवण्यासाठी मोठी कसरत करावी लागली. बाजुलाच एका जागी बांधकाम सुरु होतं. तेथील मोकळ्या जागेच्या सहाय्याने अखेर अग्निशमन दलाचे जवान आतमध्ये पोहोचले. पाच तासांच्या अथक प्रयत्नानंतर आग विझवण्यात यश मिळालं. रात्री ९ वाजता आग विझवण्यात आली.
