तृतीयपंथीय समाजाच्या नेत्या प्रिया पाटील यांनी राष्ट्रवादी काँग्रेस या पक्षात प्रवेश केला. यावेळी त्यांना राष्ट्रवादी काँग्रेसच्या कार्यकारिणी सदस्याची जबाबदारी देण्यात आली. प्रिया पाटील यांना या संदर्भातले पत्र खासदार सुप्रिया सुळे यांच्या हस्ते देण्यात आले. समाजातील दुर्लक्षित आणि वंचित घटकांना एकत्र आणण्याचे काम करण्यासाठी राष्ट्रवादी काँग्रेसने कायमच पुढाकार घेतला आहे असे म्हटले. आघाडी सरकार असताना २००४ मध्ये संजय गांधी योजनेचा लाभ ट्रान्सजेन्डर्सनाही देण्यात आला होता असेही त्यांनी स्पष्ट केले. खासदार सुप्रिया सुळे यांनी प्रिया पाटील यांचे स्वागत केले. यशवंतराव चव्हाण प्रतिष्ठानच्या माध्यमातून आम्ही ट्रान्सजेन्डर्ससाठी काम करत आहोत. त्यात प्रिया पाटील यांची भूमिका महत्त्वाची आहे. ३७७ बिलच्या बाजूने राष्ट्रवादी काँग्रेस उभी राहिली आहे, आम्ही सर्व समाजाला सोबत घेऊन चालणारे लोक आहोत असंही सुप्रिया सुळे यांनी म्हटलं आहे. तर राष्ट्रवादी काँग्रेसने मला ही संधी दिली त्याबद्दल मी पक्षाची आभारी आहे. राष्ट्रवादी काँग्रेस पक्षाने आमचे प्रश्न सोडवण्यासाठी खूप प्रयत्न केले. मी यापुढे याच पक्षासोबत एकनिष्ठ राहिन असंही प्रिया पाटील म्हणाल्या.
