मनसे पदाधिकाऱ्यावर हल्ला केल्याप्रकरणी शिवसेना नगरसेवकाला पोलिसांनी बेड्या ठोकल्या आहेत. नवी मुंबईतील शिवसेना नगरसेवक राजू कांबळे यांना रविवारी रबाले पोलिसांनी अटक केली आहे. ऐरोलीमधील मनसे विभाग अध्यक्ष विश्वनाथ दळवी यांच्यावर राजू कांबळे यांनी जोडीदाराच्या मदतीने लोखंडी रॉडने हल्ला केला होता. या हल्ल्यात दळवी गंभीर जखमी झाले आहे. त्यांच्यावर खासगी रूग्णालयात उपचार करण्यात येत आहेत. कुटुंबियांनी पोलिसात तक्रार केली आहे. ऐरोली गावात नगरसेवक राजू कांबळे यांच्या वॉर्डात गटाराचे काम सुरु होते. कामात निकृष्ट दर्जाचे साहित्य वापरले जात असल्याचा आक्षेप विश्वनाथ दळवी यांनी घेतला होता. आपल्या कामात नाक खुपसल्याचा राग ठेवून दळवींवर कांबळेंनी हल्ला केल्याचा आरोप करण्यात आला आहे.
