शिवसेनेचे नगरसेवक मिलिंद वैद्य यांनी कोंबडी विक्रेत्यांना जबर मारहाण केली आहे. माहीम मच्छिमार कॉलनी येथे ही मारहाण करण्यात आली. कोंबडी विक्रेत्यांनी आपल्या गाड्या परिसरात उभ्या केल्याने वाहतूक कोंडी निर्माण होत असल्याच्या रागातून मिलिंद वैद्य यांनी ही मारहाण केली. या मारहाणीचा व्हिडीओ समोर आला असून चांगलाच व्हायरल होत आहे.

व्हिडीओत मिलिंद वैद्य यांच्यासहित एक कार्यकर्ता कोंबडी विक्रेत्यांना मारहाण करत असल्याचं दिसत आहे. माहीम रेल्वे स्थानकाजवळ कोंबडी विक्रेत्यांनी आपले टेम्पो पार्क केले होते. व्हिडीओत दिसत असल्याप्रमाणे मिलिंद वैद्य आपल्या समर्थकांसह तिथे येऊन थेट मारहाण करण्यास सुरुवात करतात. किती वेळा सांगितलं आहे अशी विचारणा करत ते कोंबडी विक्रेत्याला माराहण करताना दिसत आहेत. यावेळी त्यांनी टेम्पोला अडकवलेल्या वजनकाट्याची तोडफोडही केली. तसंच मारहाण करताना शिवीगाळदेखील करण्यात आली.

“गेल्या अनेक दिवसांपासून परिसरातील नागरिकांना कोंबडी विक्रेत्यांचा त्रास सहन करावा लागत आहे. एकाच वेळी अनेक गाड्या उभ्या केल्याने या परिसरात वाहतूक कोंडी निर्माण होते. तसंच कोंबड्यांची विष्ठा आणि पिसे यामुळेही घाण आणि कचरा निर्माण होतो”, असं स्पष्टीकरण मिलिंद वैद्य यांनी दिलं आहे.