राज्य पोलीस दलातील करोनाबाधित सहा अधिकारी आणि अंमलदारांचा गेल्या २४ तासांत मृत्यू झाला. त्यात मुंबई, ठाण्याच्या दोन अंमलदारांचा समावेश आहे. मुंबईतील टिळकनगर पोलीस ठाण्याचे हवालदार अशोक गवारे, ठाण्यातील शीळ डायघर पोलीस ठाण्यातील हवालदार, नाशिक मुख्यालयातील सहायक उपनिरीक्षक बाळू शिंदे, भंडारा जिल्ह्य़ातील जवाहर नगर पोलीस ठाण्याचे हवालदार नाथू सार्वे, सोलापूरचे उपनिरीक्षक शौकत अली शेख आणि गोंदियाचे पोलीस नाईक राजेश दोंदे यांचा करोनाने मृत्यू झाला. पोलीस मुख्यालयाने दिलेल्या माहितीनुसार मार्च महिन्यापासून आतापर्यंत २२३ अधिकारी, अंमलदारांचा मृत्यू झाला. करोनाबाधीत पोलिसांची संख्या २१ हजार ३११ वर पोहोचली. यापैकी १७ हजार ४३४ पोलीस करोनामुक्त झाले. तर तीन हजार ६५५ पोलीस उपचार घेत आहेत.
