पश्चिम रेल्वेवर नव्याने धावत असलेल्या बम्बार्डियर लोकलचा वेग वाढवण्याचा निर्णय घेण्यात आला आहे. प्रतितास ७० किलोमीटरवरून प्रतितास ९० किलोमीटर वेगाने या गाडय़ा धावणार आहेत. नवीन वर्षांपासून त्याची अंमलबजावणी होणार असून, प्रवाशांच्या वेळेची बचत होणार आहे. पश्चिम रेल्वेवर ‘मुंबई शहर वाहतूक प्रकल्प-२’अंतर्गत अधिक आरामदायी आणि हवेशीर असलेल्या बम्बार्डियर लोकल धावत असून त्याला प्रवाशांनी पसंती दिली आहे. पश्चिम रेल्वेवर नवीन ६३ बम्बार्डियर लोकल कार्यरत असून त्यांची कमाल क्षमता प्रतितास ११० किलोमीटर इतकी आहे. मात्र, जलद मार्गावर या लोकलचा वेग प्रतितास ८० ते १०० किमी असून धिम्या मार्गावर मात्र प्रतितास ७० किलोमीटर आहे. नव्या वर्षांपासून बम्बार्डियर लोकलचा वेग हा मुंबई सेन्ट्रल ते बोरिवली स्थानकादरम्यान ७० ऐवजी प्रतितास ९० एवढा असेल, अशी माहिती पश्चिम रेल्वेचे मुख्य जनसंपर्क अधिकारी रवींद्र भाकर यांनी दिली. बम्बार्डियरचा वेग सुमारे ९० किमी प्रतितास केला जाणार असल्याने प्रत्येक लोकल फेरीचा वेग प्रतितास २० किलोमीटर इतका वाढणार आहे. त्यामुळे बोरीवली पर्यंत प्रवास करणाऱ्या प्रवाशांच्या वेळेत मोठी बचत होणार आहे.
