20 September 2020

News Flash

कायदा-सुव्यवस्थेचा तिढा आता दिल्ली दरबारी

रेल्वेच्या हद्दीत एखादा गुन्हा घडल्यावर त्याची जबाबदारी कोणाची, यावरून नेहमी होणारी वादावादी टाळण्यासाठी आणि प्रवाशांच्या सुरक्षेसाठी एकात्मिक दृष्टिकोन बाळगण्यासाठी रेल्वे ठोस उपाययोजना करणार आहे.

| January 10, 2015 03:03 am

रेल्वेच्या हद्दीत एखादा गुन्हा घडल्यावर त्याची जबाबदारी कोणाची, यावरून नेहमी होणारी वादावादी टाळण्यासाठी आणि प्रवाशांच्या सुरक्षेसाठी एकात्मिक दृष्टिकोन बाळगण्यासाठी रेल्वे ठोस उपाययोजना करणार आहे. त्यासाठी या सर्व विषयांवर खुलेपणाने चर्चा घडवण्याच्या उद्देशाने रेल्वेमंत्री सुरेश प्रभू १५ जानेवारी रोजी दिल्लीत एक बैठक घेणार आहेत. या बैठकीत देशातील सर्वच राज्यांच्या पोलीस महासंचालकांना बोलावण्यात आले आहे. तसेच गृहमंत्री राजनाथ सिंह यांचाही या बैठकीत सहभाग असेल, असे रेल्वेमंत्री सुरेश प्रभू यांनी शुक्रवारी सांगितले. रेल्वे सुरक्षा दल आणि एम इंडिकेटर यांच्या संयुक्त विद्यमाने महिला सुरक्षेसाठी सुरू केलेल्या अ‍ॅपच्या उद्घाटन प्रसंगी ते बोलत होते.
प्रवाशांची सुरक्षा ही वाहतूकदाराची जबाबदारी असते. उपनगरीय रेल्वेसह संपूर्ण देशभरात दर दिवशी दोन कोटी प्रवासी प्रवास करत असतात. या सर्वच प्रवाशांच्या सुरक्षेची जबाबदारी रेल्वेची आहे. मात्र यातील तांत्रिक अडचण म्हणजे कायदा व सुव्यवस्था ही बाब राज्याच्या अखत्यारीत येते. त्यामुळे रेल्वेमार्गावर घडणाऱ्या गुन्ह्य़ांचा तपास लोहमार्ग पोलिसांच्या हाती आहे. तर रेल्वेच्या मालमत्तेचे नुकसान, रेल्वेरूळ ओलांडणे, टपावरून प्रवास करणे आदी गोष्टींबाबतची कारवाई रेल्वे सुरक्षा दल करते. रेल्वे स्थानकांवरील सीसीटीव्ही कॅमेरे रेल्वे सुरक्षा दलाच्या हाती असले, तरी त्यांतील चित्रीकरण अनेक गुन्ह्य़ांची उकल करण्यासाठी लोहमार्ग पोलिसांच्या उपयोगी पडते. मात्र यासाठी दोहोंमध्ये बराच वादही सुरू असतो.
या सर्व वादावर तोडगा काढण्यासाठी आता थेट रेल्वेमंत्री सुरेश प्रभू यांनीच पुढाकार घेतला आहे. लोहमार्ग पोलीस हाती असलेल्या पोलीस महासंचालकांची बैठक प्रभू यांनी बोलावली असून ही बैठक १५ जानेवारी रोजी दिल्लीत होणार आहे. या बैठकीला गृहमंत्री राजनाथ सिंह हेदेखील उपस्थित असतील. या बैठकीत रेल्वे सुरक्षा दल आणि लोहमार्ग पोलीस यांच्यातील समन्वयासाठी काय उपाययोजना करता येतील, लोहमार्ग पोलिसांना रेल्वेकडून काय सहकार्य अपेक्षित आहे, आदी गोष्टी जाणून घेतल्या जातील, असे प्रभू यांनी स्पष्ट केले. दोन्ही दलांनी एकात्मिक दृष्टिकोन बाळगायला हवा. याबाबत सर्व राज्यांच्या मुख्यमंत्र्यांसह बैठक घेणार असून त्यांचाही दृष्टिकोन जाणून घेण्यात येईल, असेही ते म्हणाले.

‘हेल्प अ‍ॅप’चे उद्घाटन
रेल्वे सुरक्षा दल आणि एम इंडिकेटर यांच्या संयुक्त विद्यमाने सुरू झालेल्या ‘हेल्प’ या अ‍ॅपचे उद्घाटन पश्चिम रेल्वेच्या मुख्यालयात रेल्वेमंत्री सुरेश प्रभू यांच्या हस्ते करण्यात आले. महिला सुरक्षेला केंद्रस्थानी ठेवून बनवण्यात आलेल्या या अ‍ॅपचा समावेश एम इंडिकेटर या अ‍ॅपमध्येच करण्यात आला आहे. या अ‍ॅपद्वारे आणीबाणीच्या परिस्थितीत प्रवासी महिला तिच्या कुटुंबीयांपैकी दोघांना थेट संदेश पाठवू शकते. या संदेशात संबंधित महिलेचे सध्याचे ठिकाणही नोंदवण्यात येणार आहे. तसेच या हेल्प आयकॉनवर क्लिक केल्यानंतर पश्चिम आणि मध्य रेल्वेच्या रेल्वे सुरक्षा दलांनाही त्वरित संदेश पोहोचणार आहे. त्यानुसार या महिलेला तातडीने मदत मिळेल.

लोकसत्ता आता टेलीग्रामवर आहे. आमचं चॅनेल (@Loksatta) जॉइन करण्यासाठी येथे क्लिक करा आणि ताज्या व महत्त्वाच्या बातम्या मिळवा.

First Published on January 10, 2015 3:03 am

Web Title: state police chiefs to meet on jan 15 for railway security railway minister suresh prabhu
Next Stories
1 उद्या मेगाब्लॉक
2 मेट्रो भाडेवाढ जाचकच
3 ‘मध्य रेल्वेसाठी स्वतंत्र कृती दल’
Just Now!
X