News Flash

ब्रिटनमधून आलेल्या १ हजार प्रवाशांचा शोध घेण्यात यश

आणखी काही नागरिकांचा शोध पालिका घेत आहे.

(हे छायाचित्र संग्रहित असून, प्रातिनिधीक स्वरूपात वापरण्यात आलेलं आहे. )

करोनाच्या नव्या विषाणूचा थैमान सुरू असलेल्या ब्रिटनमधून गेल्या महिनाभरात मुंबईत दाखल झालेल्या सुमारे एक हजार नागरिकांचा शोध घेण्यात पालिकेला यश आले आहे. या सर्वाची वैद्यकीय तपासणी करण्यात आली असून या नागरिकांमध्ये कोणतीही लक्षणे आढळून न आल्याने पालिकेने सुटकेचा नि:श्वास टाकला आहे. आणखी काही नागरिकांचा शोध पालिका घेत आहे.

ब्रिटनमध्ये करोनाचा नवा विषाणू सापडल्यामुळे चिंतेचे वातावरण असून टाळेबंदी जाहीर करण्यात आली आहे. परिणामी ब्रिटनहून भारतात येणारी विमान सेवा बंद करण्यात आली आहे. मात्र गेल्या महिनाभरात म्हणजे २५ नोव्हेंबरनंतर ब्रिटनहून सुमारे १५९३ प्रवासी मुंबईत आले असून त्यांची यादी विमानतळ प्राधिकरणाकडून पालिकेला उपलब्ध झाली आहे. या यादीच्या आधारे पालिकेने प्रवाशांचा शोध सुरू केला आहे.

आतापर्यंत सुमारे एक हजार प्रवाशांचा शोध घेण्यात पालिका यशस्वी झाली असून या प्रवाशांची वैद्यकीय तपासणी करण्यात येत आहे. तपासणीदरम्यान प्रवाशांना करोनाची लक्षणे आहेत का याची खातरजमा करण्यात येत आहे. मात्र वैद्यकीय तपासणी केलेल्या प्रवाशांमध्ये तूर्तास तरी एकालाही लक्षणे नसल्याचे आढळले आहे. त्यामुळे पालिका अधिकाऱ्यांनी सुटकेचा नि:श्वास टाकला आहे.

शोधमोहीम युद्धपातळीवर

ब्रिटनहून आलेल्या नागरिकांना करोनाच्या नव्या संसर्गाची बाधा झाल्याची शक्यता आहे. त्यामुळे महिनाभरापूर्वी तेथून  आलेल्या सर्वाचा शोध घेण्यात येत आहे. एखाद्याला बाधा झाली असेल, तर त्याच्यामुळे अन्य नागरिकांना संसर्ग होण्याची शक्यता नाकारता येत नाही. त्यामुळे ही शोधमोहीम युद्धपातळीवर हाती घेण्यात आली आहे. उर्वरित ५९३ प्रवाशांचा युद्धपातळीवर शोध सुरू असल्याची माहिती अतिरिक्त पालिका आयुक्त सुरेश काकाणी यांनी सांगितले.

लोकसत्ता आता टेलीग्रामवर आहे. आमचं चॅनेल (@Loksatta) जॉइन करण्यासाठी येथे क्लिक करा आणि ताज्या व महत्त्वाच्या बातम्या मिळवा.

First Published on December 26, 2020 12:00 am

Web Title: success in finding 1000 passengers from britain abn 97
Next Stories
1 अपघातातील मृतांच्या कुटुंबीयांना ४७ लाखांची भरपाई
2 ब्रिटनवरील हवाई बंदीचा चित्रपटांना फटका
3 करोना कहर सुरु झाल्यापासून आज पहिल्यांदाच धारावीत करोनाचा एकही रुग्ण पॉझिटिव्ह नाही
Just Now!
X