मुंबई : विविध कामांसाठी रविवार, १७ नोव्हेंबरला रेल्वेच्या तीनही मार्गावर मेगा ब्लॉक घेण्यात येणार आहे. मध्य रेल्वे-मुख्य मार्गावर कल्याण ते ठाणे अप जलद मार्ग, हार्बरवर पनवेल ते वाशी दोन्ही मार्गावर व पश्चिम रेल्वेवर मरिन लाइन्स ते माहीम डाऊन धिम्या मार्गावर ब्लॉक असेल. मध्य रेल्वे-मुख्य मार्ग कुठे- कल्याण ते ठाणे अप जलद मार्ग कधी- स.११.२० ते दु.३.५० वा परिणाम - कल्याण ते ठाणे मार्गादरम्यान अप जलद लोकल धिम्या मार्गावर चालवण्यात येणार आहेत. त्यानंतर ठाणे ते सीएसएमटीपर्यंत पुन्हा जलद मार्गावर धावतील. मुलुंड, भांडुप, विक्रोळी, घाटकोपर, कुर्ला, दादर, भायखळा स्थानकात जलद लोकल थांबतील. रत्नागिरी ते दादर पॅसेंजर दिवा स्थानकापर्यंत चालवण्यात येईल. याच स्थानकातून रत्नागिरीसाठी गाडी सुटेल. हार्बर मार्ग कुठे - पनवेल ते वाशी दोन्ही मार्गावर कधी - स. ११.३० ते दु. ४.०० वा. परिणाम - पनवेल ते सीएसएमटी सकाळी ११.०६ ते सायं. ४ व सीएसएमटी ते पनवेल, बेलापूर दरम्यान स. १०.०३ ते दु. ३.१६ पर्यंत लोकल रद्द करण्यात आल्या आहेत. सीएसएमटी ते वाशी दरम्यान विशेष लोकल फेऱ्या चालवण्यात येतील. ठाणे ते पनवेल ट्रान्स हार्बर मार्गावरील फेऱ्या रद्द करण्यात आल्या आहेत. तर ठाणे ते वाशी, नेरुळ या ट्रान्स हार्बरवर लोकल धावतील. नेरुळ, बेलापूर ते खारकोपर दोन्ही मार्गावरील लोकल फेऱ्या रद्द राहतील. पश्चिम रेल्वे कुठे - मरिन लाइन्स ते माहीम डाऊन धिमा मार्ग कधी - स. १०.३५ ते दु. ३.३५ वा. परिणाम - मरिन लाइन्स ते माहीम दरम्यान अंधेरीच्या दिशेने जाणाऱ्या धिम्या मार्गावर ब्लॉक असल्याने या मार्गावरील लोकल डाऊन जलद मार्गावर धावतील. त्यामुळे महालक्ष्मी, प्रभादेवी, माटुंगा रोड स्थानकात धिम्या लोकल थांबणार नाहीत. कुर्ला स्थानकाजवळील पादचारी पूल पाडणार मुंबई : कुर्ला स्थानकाजवळील सीएसएमटीच्या दिशेने असणारा दुसरा पादचारी पूल १६ नोव्हेंबरच्या रात्री पाडण्यात येणार आहे. यासाठी रात्री ११.३० ते १७ नोव्हेंबरच्या पहाटे ४.३० पर्यंत ब्लॉक घेण्यात येईल. हा पूल पाडून नवीन पुलासाठी गर्डर बसवण्यात येणार आहे. त्यामुळे माटुंगा स्थानकातून ठाण्याच्या दिशेने जाणाऱ्या धीम्या लोकल विद्याविहापर्यंत जलद मार्गावर चालवण्यात येतील. त्यामुळे विद्याविहार स्थानकात डाऊन धीम्या लोकल थांबणार नाहीत. मेल-एक्स्प्रेस गाडय़ांच्याही वेळापत्रकावर काहीसा परिणाम होण्याची शक्यता आहे.
