ताडदेव येथील पारशी कॉलनीमधील भिंत कोसळून झालेल्या दुर्घटनेत तिघे ठार झाले. या तिघांना जखमी अवस्थेत नायर रुग्णालयात नेण्यात आले होते. परंतु तेथे पोहोचण्यापूर्वीच दोघांचा, तर उपचारांदरम्यान एकाचा मृत्यू झाला. पाारशी कॉलनीतील इलाभाई इमारतीजवळील भिंत शनिवारी मध्यरात्री २.३०च्या सुमारास कोसळली. त्याखाली मनोजकुमार सिंग (३६), रोहितकुमार सिंग (४६) आणि मनीषकुमार सिंग (२२) हे अडकले. गंभीर जखमी अवस्थेत या तिघांना ढिगाऱ्याखालून काढून नायर रुग्णालयात नेण्यात आले. मात्र मनोजकुमार सिंग आणि रोहितकुमार सिंग हे ठार झाल्याचे डॉक्टरांनी जाहीर केले. मनीषकुमार सिंग याला नायर रुग्णालयात दाखल करण्यात आले होते. मात्र रविवारी सायंकाळी मनीषकुमार सिंगचाही मृत्यू झाला.
