शिवसंग्राम पक्षाचे अध्यक्ष विनायक मेटे यांनी छत्रपती शिवाजी महाराज स्मारक समन्वय समितीच्या अध्यक्षपदाचा राजीनामा दिला आहे. मुख्यमंत्री उद्धव ठाकरे यांना पत्र लिहून त्यांनी याबाबत कळवलं आहे. तसेच, शिवस्मारकाचं काम लवकरात लवकर पूर्ण व्हाव, अशी त्यांनी इच्छा व्यक्त केली आहे. आपल्या नेतृत्वात छत्रपती शिवाजी महाराजांच्या स्मारकाचं काम लवकरात लवकर पूर्ण होवो, अशी सदिच्छा व्यक्त करत या कामात माझी काही आवश्यकता भविष्यात भासल्यास माझे सदैव सहकार्य राहील, असं मेटेंनी मुख्यमंत्र्यांना पाठवलेल्या पत्रात म्हटलं आहे. छत्रपती शिवाजी महाराज स्मारक समन्वय समितीच्या अध्यक्षपदी विनायक मेटे यांची नियुक्ती २०१५ मध्ये तत्कालीन मुख्यमंत्री देवेंद्र फडणवीस यांनी केली होती. मात्र, आता राज्यात सत्ता बदल झालेला असल्याने मेटे यांनी राजीनामा दिलेला आहे. मुख्यमंत्री उद्धव ठाकरे आपल्या नेतृत्वात राज्यात महाविकासआघाडीचे सरकार आलेले असल्याने, आपल्या विचारानुसारच इतर विकासाची कामं होणं अपेक्षित आहे. याचप्रमाणे शिवस्मारकाचे काम देखील आपल्या विचाराने व्हावे म्हणून मी छत्रपती शिवाजी महाराज स्मारक प्रकल्प अंमलबजावणी, देखरेख आणि समन्वय समितीच्या अध्यक्षपदाचा राजीनामा देत आहे. कृपया आपण राजीनामा स्वीकार करावा ही विनंती, असं मेटे यांनी पत्रात म्हटलेलं आहे.
