News Flash

“पश्चिम बंगालमध्ये ममता बॅनर्जींना हरवणं सोपं नाही”, संजय राऊतांनी वर्तवलं ५ राज्यांच्या निकालांचं भाकित!

पश्चिम बंगालमध्ये ममतादीदीच! संजय राऊतांनी वर्तवला अंदाज!

पश्चिम बंगाल, तामिळनाडू, केरळ, आसाम आणि पुद्दुचेरी या पाच राज्यांच्या विधानसभा निवडणुकांचे निकाल आज लागणार आहेत. देशभरात एकीकडे करोनाचं मोठं संकट सुरू असताना राजकीय वर्तुळात आज या निकालांची चर्चा आहे. शिवसेना खासदार संजय राऊत यांनी माध्यम प्रतिनिधींशी बोलताना या निवडणुकांबाबत त्यांचं भाकित वर्तवलं आहे. “हे सगळ्यांना माहिती आहे. तामिळनाडू आणि पाँडिचेरी सोडून कुठेही सत्तापरिवर्तन होणार नाही. पश्चिम बंगालमध्ये तृणमूल काँग्रेसच सरकार बनवेल. केरळमध्येही सत्तापरिवर्तन होणार नाही. नंदीग्रामबाबत चर्चा काहीही होऊ देत, पण ममतादीदींचं धैर्य मानायलाच हवं. त्या दोन जागांवर लढल्या नाहीत. त्या एकाच जागेवर लढल्या. त्यांनी आव्हान स्वीकारलं. पश्चिम बंगालमध्ये ममता दीदींना हरवणं सोपं नाही. पश्चिम बंगालमध्ये तृणमूलचंच सरकार येणार”, असं राऊत म्हणाले आहेत.

Assembly Election Results 2021 LIVE : तामिळनाडूत सत्तांतराची चाहूल; केरळमध्ये एलडीएफ आघाडीवर

“सत्ता नाही, पण भाजपाचे आकडे वाढतील!”

दरम्यान, यावेळी संजय राऊत यांनी भाजपाचे आकडे वाढतील असं सांगितलं आहे. तसेच, भाजपाला खोचक टोला देखील लगावला आहे. “भाजपानं केलेल्या व्यवस्थापनाचं कौतुक केलंच पाहिजे. त्यांनी प्रचंड मेहनत केली. देशभरातून लोकं आणली. देशाचे पंतप्रधान करोनाच्या संकटकाळात देखील तिथे तंबू ठोकून बसले. राज्याराज्यांचे मुख्यमंत्री आणि केंद्रीय मंत्री नेऊन बसवले. पण पश्चिम बंगालमध्ये ममता बॅनर्जींना हरवणं इतकं सोपं नाही. बहुमताचा आकडा कमी होईल कदाचित त्यांचा. पण निकाल हाती येतील, तेव्हा तृणमूल काँग्रेसचंच सरकार तिथे आलेलं असेल. भाजपाचे आकडे नक्कीच वाढत आहेत. लोकसभेतही वाढले आहेत. त्यांची मेहनतही आहे, गुंतवणूकही आहे, सगळंच आहे”, असं ते म्हणाले.

पंढरपूरमध्ये नेमकं काय होणार? ५ राज्यांसोबतच पंढरपूरच्या निकालाचीही उत्सुकता!

निवडणुकीपेक्षा करोनाची चिंता जास्त

दरम्यान, यावेळी बोलताना संजय राऊत यांनी करोनाची चिंता मोठी असल्याचं सांगितलं. “निवडणुकीचं हे वातावरण दुपारपर्यंत संपून जाईल. देशभरात आजही सर्वात मोठं संकट हे करोनाचं आहे. देशात कुणीही करोनाच्या संकटात निवडणुकीवर लक्ष देत नाहीये. आम्हाला चिंता कुणाच्या राजकीय आकड्यांच्या वाढीपेक्षा करोनाच्या वाढीची आहे. सर्वोच्च न्यायालयाने आणि मद्रास न्यायालयाने स्पष्टपणे सांगितलं आहे की देशात करोनाचा प्रसार होण्यासाठी निवडणूक आयोग जबाबदार आहे. निवडणुकीचं नियोजन केलं पण गर्दी नियंत्रणात आणली नाही. त्यासाठी आपण किंमत मोजतो आहोत. देशात ४ लाखांच्या वर करोनाचे रुग्ण वाढले आहेत. हजारो रुग्ण मरत आहेत. ऑक्सिजन, बेड नाहीत. हे कशामुळे होतंय याचं चिंतन करण्याची गरज आहे”, असं देखील संजय राऊत यांनी यावेळी सांगितलं.

लोकसत्ता आता टेलीग्रामवर आहे. आमचं चॅनेल (@Loksatta) जॉइन करण्यासाठी येथे क्लिक करा आणि ताज्या व महत्त्वाच्या बातम्या मिळवा.

First Published on May 2, 2021 10:12 am

Web Title: west bengal assembly election 2021 shivsena sanjay raut on mamata banerjee pmw 88
Next Stories
1 मुंबईच्या प्राणवायूची नवी मुंबई-ठाण्याकडून वाटमारी
2 भाज्या, डाळी महाग…
3 अभिनेते मेजर विक्रमजीत कंवरपाल यांचे निधन
Just Now!
X