नोकरी गेल्यामुळे निराश झालेल्या एका तरुणाने इमारतीच्या गच्चीवर गळफास लावून आत्महत्या केली. प्रतिक पुरोहित (२७) असे या तरुणाचे नाव आहे. सोमवारी सकाळी बोरीवली ही घटना उघडकीस आली. बॅंकेतील नोकरी गेल्याने तो निराश होता.बोरीवली पश्चिमेच्या गांजावाला लेन येथील गांजावाला अपार्टमेंट मध्ये राहणारा प्रतिक एका खाजगी बॅंकेत नोकरी करत होता. काही महिन्यांपूर्वी त्याची नोकरी सुटली. त्याचे लग्नही झाले होते. परंतु नोकरी नसल्याने तो निराश झाला होता. रविवारी रात्री त्याने कुटुंबियांसमवेत जेवण घेतले. सोमवारी सकाळी तो घरातून गायब झाला. त्याचा सर्वत्र शोध सुरु असताना इमारतीच्या गच्चीवरील पाण्याच्या पाइपला गळफास लावलेल्या स्थितीत त्याचा मृतदेह आढळला. आत्महत्येपूर्वी त्याने लिहिलेली चिठ्ठी पोलिसांना सापडली आहे. माझ्या मृत्यूस कोणासही जबाबदार धरू नये असे त्याने चिठ्ठीत लिहिल्याचे पोलिसांनी सांगितले. गेल्या काही दिवसांपासून तो निराश होता. त्यामुळेच त्याने आपली जीवनयात्रा संपवण्याचा निर्णय घेतला असावा, असे निकटवर्तीयांनी सांगितले.
