भ्रमणध्वनीवर गाणी ऐकण्याच्या नादात एका तरुणीला जीव गमवावा लागला. मीरा रोड येथे बुधवारी रात्री ही दुर्घटना घडली. राजश्री जाधव (१८) असे या तरुणीचे नाव आहे. गच्चीवर भ्रमणध्वनीवर गाणी ऐकत असताना तो हातातून निसटला आणि भ्रमणध्वनी पकडण्याच्या नादात तोल जाऊ ती खाली पडली. राजश्री ही मीरा रोड पूर्वेच्या पूजा गार्डन परिसरातील गगनगिरी इमारतीत राहात होती. इमारतीच्या चौथ्या मजल्यावर तिचा टेरेस फ्लॅट होता. दहिसर चेकनाक्याजवळील ठाकूर मॉलमध्ये ती काम करत होती. बुधवारी रात्री घरी गाणी ऐकताना हातातून निसटलेला भ्रमणध्वनी पकडण्याच्या प्रयत्नात गच्चीतून खाली पडून ती जखमी झाली़ तिला तातडीने खाजगी रुग्णालयात दाखल करण्यात आले. उपचारादरम्यान गुरुवारी सकाळी तिचा मृत्यू झाला. नवघर पोलिसांनी या प्रकरणी अपघाती मृत्यूची नोंद केली आहे.
