Mumbai FYJC Cutoff 2026 : अकरावीच्या प्रवेश पात्रता गुण घटले; ०.४० ते २ टक्क्यांपर्यंत घट

मुंबई विभागामध्ये इयत्ता दहावीच्या निकालामध्ये ९० टक्क्यांपेक्षा अधिक गुण मिळविलेल्या विद्यार्थ्यांची संख्या १३ हजार ५९१ इतकी आहे. गतवर्षी ही संख्या १७ हजार ८९५ इतकी होती. त्याचप्रमाणे ८५ ते ९० आणि ८० ते ८५ टक्के या श्रेणींमध्येही गतवर्षीच्या तुलनेत यंदा घट झालेली होती. त्यामुळे यंदा अकरावी प्रवेशाच्या कटऑफमध्ये घसरण होण्याची शक्यता निर्माण झाली होती.

शुक्रवारी जाहीर झालेल्या अकरावी प्रवेशाच्या पहिल्या यादीमध्ये काही महाविद्यालयांमधील कटऑफ स्थिर राहिले असले तरी बहुतांश सर्वच महाविद्यालयांमधील कला, वाणिज्य व विज्ञान शाखांच्या कटऑफमध्ये घसरण झाली. गुणवंताची संख्या कमी झाल्याने ही घसरण झाली असून ८५ ते ९० टक्के गुण मिळविलेल्या विद्यार्थ्यांनाही नामांकित महाविद्यालयांमध्ये सहज प्रवेश मिळण्याचा मार्ग मोकळा झाला आहे.

वाणिज्य शाखेसाठी विद्यार्थ्यांची पसंती असलेल्या एच.आर. महाविद्यालयामध्ये कट ऑफ ९३.४० वरून ९३ टक्क्यांवर आला असून, ०.४० टक्क्यांची घसरण झाली आहे. सेंट झेवियर्स महाविद्यालयामध्ये ९०.८० वरून ९०.४० टक्क्यांपर्यंत घट झाली. के.सी. महाविद्यालय आणि जय हिंद महाविद्यालयामध्ये प्रत्येकी सुमारे ०.४० टक्क्यांची घसरण झाली आहे.

मात्र, रुपारेल महाविद्यालयामध्ये वाणिज्य शाखेचा कट ऑफ स्थिर आहे. कला शाखेत सेंट झेवियर्स महाविद्यालयाचा कट ऑफ ९३.४० वरून ९२.६०, तर रुईयाचा कटऑफ ९२.४० वरून ९१.८० टक्क्यांपर्यंत घसरला आहे. मात्र रुपारेल महाविद्यालयाचा कटऑफमध्ये वाढ झाली. ८६.८० वरून ८७.६० टक्क्यांपर्यंत कटऑफ वाढला आहे.

विज्ञान शाखेत रुईया महाविद्यालयाचा कटऑफ ९४.४० वरून ९३.२० टक्क्यांवर म्हणजेच तब्बल १.२० टक्क्यांची घसरला आहे. मिठीबाई महाविद्यालयाचा कटऑफही कटऑफ ९१.६० वरून ८८.२० टक्क्यांपर्यंत म्हणजे ३.४० टक्के इतकी घसरण झाली आहे. साठ्ये महाविद्यालयाचा कटऑफ ९१.४० टक्क्यांवरून ८९.४० टक्के म्हणजेच १ टक्के आणि सी.एच.एम महाविद्यालयाचा कटऑफही ९१.६० टक्क्यांवरून ८९.२० टक्के म्हणजे २.४० टक्क्यांनी घसरला आहे.

कटऑफची तुलनात्मक स्थिती (कंसामध्ये गतवर्षीचे टक्केवारी)